Van Gaal: Þakklátur fyrir stuðning Fergusons

Louis van Gaal, knattspyrnustjóri Manchester United, er þakklátur fyrir þann stuðning sem Sir Alex Ferguson hefur sýnt honum síðan hann kom til félagsins í sumar.

"Hann hefur trú á mér og ég ánægður með það," sagði Hollendingurinn.

"Það gerir starf mitt auðveldara. Hann hefur sýnt mér mikinn stuðning sem maður þarf á að halda í þessu starfi.

"Þegar þú ert knattspyrnustjóri Manchester United þarftu á stuðningi og trú manna á borð við Sir Alex að halda. En því fylgir einnig pressa að ná góðum úrslitum," sagði van Gaal ennfremur, en United mætir Newcastle United á Old Trafford á öðrum degi jóla.

Leikmenn United eru vanir að æfa á jóladag og dvelja á hóteli aðfaranótt 26. desember. Van Gaal breytti hins vegar út af vananum og gaf leikmönnunum frí á morgun.

Leikur Manchester United og Newcastle United hefst klukkan 15:00 og verður sýndur í beinni útsendingu á Stöð 2 Sport 2.