Rooney getur keypt einn Range Rover á dag eftir launahækkunina

Wayne Rooney er búinn að gera nýjan fimm og hálfs árs samning við Manchester United, samkvæmt frétt BBC fyrr í dag. Þar með er ljóst að enski landliðsframherjinn verður ekkert á neinum sultarlaunum til ársins 2019.

Rooney fær 300 þúsund pund í vikulaun eða 57 milljónir íslenskra króna. Hann er því með meira en átta milljónir í laun fyrir hvern dag næstu 66 mánuði.

Rooney er mikill aðdáandi Range Rover-jeppa og til að setja launin í eitthvað samhengi þá getur framherjinn keypt sér glænýjan Range Rover Evoque á hverjum degi til ársins 2019. Hann ætti þó reyndar ekki mikið eftir fyrir eldsneyti. Sem er synd.

Venjulegur vinnandi maður á Íslandi skilar um 40 tíma vinnuviku og ef við yfirfærum laun Rooney á slíka vinnskyldu þýðir það að hann er að að fá 1,4 milljónir á tímann.

Til viðmiðs má benda á að regluleg laun fullvinnandi launamanna á Íslandi voru 402.000 krónur að meðaltali árið 2012, samkvæmt launakönnun Hagstofu Íslands.

Þannig má heimfæra að hver vinnandi launamaður hafi verið með um 2.300 krónur á tímann. Laun Wayne Rooney eru ekki nema fimm hundruð sinnum hærri. Ótrúlegar tölur.

Vinnuskylda Wayne Rooney er hinsvegar mun minni, ein til tvær æfingar á dag og einn til tveir leikir í viku.