Góður dagur fyrir Chelsea, Newcastle, Stoke og Everton - úrslitin í enska

Fjórir leikir fóru fram í ensku úrvalsdeildinni klukkan þrjú og stærstu fréttirnar eru að Chelsea náði fjögurra stiga forskoti á toppnum þökk sé tapi Arsenal á móti Stoke. Það var lítið skorað framan af leikjunum en mörkin létu sjá sig í seinni hálfleikjum leikjanna.

Liðsmenn Newcastle sóttu þrjú stig Hull og unnu 4-1 sigur á heimamönnum en þetta var annar sigur Newcastle í röð eftir mjög dapurt gengi í fyrstu þremur leikjum sínum eftir að félagsskiptaglugginn lokaði.

Moussa Sissoko skoraði tvö mörk fyrir Newcastle-liðið og Loic Remy sem skoraði sigurmarkið á móti Aston Villa um síðustu helgi var einnig á skotskónum í dag.

Romelu Lukaku var enn á ný hetja Everton-manna þegar hann skoraði sigurmarkið á móti West Ham níu mínútum fyrir leikslok. Markið skoraði hann að sjálfsögðu eftir stoðsendingu frá Leighton Baines.

Þjóðverjinn Andre Schurrle skoraði þrennu fyrir Chelsea í 3-1 sigri liðsins á botnliði Fulham á Craven Cottage í ensku úrvalsdeildinni í dag. Andre Schurrle skoraði öll þrjú mörkin sín á síðustu 40 mínútum leiksins en þessi sigur þýðir að Chelsea er komið með fjögurra stiga forskot á toppnum því Arsenal tapaði á sama tíma á móti Stoke City.

Stoke er erfitt heim að sækja og því fengu Arsenal-menn enn á ný að kynnast í dag þegar Stoke vann 1-0 sigur á Arsenal í ensku úrvalsdeildinni. Jon Walters skoraði sigurmarkið úr vítaspyrnu. Þetta er mikið áfall fyrir Arsenal-liðið og gæti verið afdrifaríkt í baráttu liðsins um enska meistaratitilinn.



Úrslit og markaskorarar í ensku úrvalsdeildinni í dag:

Everton - West Ham    1-0

1-0 Romelu Lukaku (81.)

Fulham - Chelsea    1-3

0-1 Andre Schurrle (52.), 0-2 Andre Schurrle (65.), 0-3 Andre Schurrle (69.), 1-3 Jonny Heitinga (74.)

Hull City - Newcastle    1-4

0-1 Moussa Sissoko (10.), 0-2 Loic Remy (42.), 1-2 Curtis Davies (46.), 1-3 Moussa Sissoko (55.), 1-4 Vurnon Anita (90.)

Stoke City - Arsenal    1-0

1-0 Jon Walters, víti (76.)