Pardew skallaði mótherja - myndband og myndir

Framkoma Alan Pardew, knattspyrnustjóra Newcastle, í dag setti skugga fyrir frábæran 4-1 sigur liðsins á Hull í ensku úrvalsdeildinni. Pardew fékk rautt spjald fyrir að skalla David Meyler, miðjumann Hull.

„Ég reyndi að ýta honum í burtu með höfðinu og hefði ekki átt að gera það. Leikmennirnir mínir voru frábærir og það var aðeins ég sem átti slakan dag," sagði Alan Pardew eftir leikinn.

„Þetta gerðist í hita leiksins og ég sé gríðarlega eftir þessu. Ég verð að passa mig að sitja bara hér eftir. Ég bið alla auðvitað afsökunar á þessu," sagði Pardew.

Atvikið gerðist eftir að David Meyler reyndi að koma Alan Pardew í burtu á hliðarlínunni svo að hann gæti tekið innkast fyrir framan þjálfaraboxið hjá Newcastle.

Það er nokkuð ljóst að Alan Pardew er á leiðinni í bann og gæti auk þess fengið stóra sekt.

Hér fyrir neðan má sjá myndir frá Getty-myndabankanum af atvikinu í dag og fyrir ofan má einnig sjá myndband af atvikinu.