„Svo vond stjórnsýsla að það jaðrar við skemmdarverk“

Sjávarútvegsráðherra býður hverjum þeim starfsmanni Fiskistofu sem flytur með stofnuninni til Akureyrar, þjár milljónir króna í ríkisstyrk. Lektor við Háskóla Íslands segir tilboð ráðherrans í engu breyta því að flutningur Fiskistofu sé svo afleit stjórnsýsla að það jaðri við skemmdarverk.

Sigurður Ingi Jóhannsson, sjávarútvegsráðherra sendi starfsmönnunum bréf þess efnis í síðustu viku. Í staðinn fyrir milljónirnar þrjár verður viðkomandi starfsmaður að skuldbinda sig til að starfa hjá Fiskistofu næstu tvö árin hið minnsta.

„Ákvörðunin sem núna er verið að taka er að fara út í umtalsverð útgjöld til að mæta kostnaði starfsfólks og þá er ekki talinn sá kostnaður sem fylgir því að flytja heila stofnun. Það er ekkert gefið í því að fólk fylgi stofnuninni, jafnvel þó því sé boðið einhverjir fjármunir. Þannig að þetta er áhætta og þetta er vond stjórnsýsla,“ segir Sigurbjörg Sigurgeirsdóttir, lektor í opinberri stjórnsýslu við stjórnmálafræðideild Háskóla Íslands.

Sigurbjörg segir að burtséð frá þeirri skoðun hennar að illa sé verið að fara með opinbert fé þá sé óumdeilt flutningur Fiskistofu sé ekki til hagsbóta fyrir stofnunina.

„Þetta er stjórnsýslustofnun. Þetta er ekki fyrirtæki sem er að framleiða vöru eða þjónustu. Þetta er umfangsmikil stjórnsýslustofnun sem fer með stjórnun og samhæfingu á eftirliti með nýtingu fiskistofna. Þessi aðgerð raskar þeirri starfsemi og það hefur áhættu í för með sér fyrir gæði og öryggi eftirlits.“

Um sjötíu manns vinna hjá Fiskistofu en ekki stendur til að flytja öll þau störf norður. Hvort útspil sjávarútvegsráðherra nú verði til þess að fleiri en fiskistofustjóri flytji með stofnuninni á eftir að koma í ljós. Eftir stendur að flutningur Fiskistofu er fráleitur að mati Sigurbjargar.

„Það getur vel verið að mönnum finnist, út frá einhverju sjónarhorni, þetta vera sniðug pólitík. En ef þetta er sniðug pólitík er þetta mjög vond stjórnsýsla, svo vond að, mínu mati, að það jaðrar við skemmdarverk,“ segir Sigurbjörg.