Þrír starfsmenn hafa fylgt stofnunum frá höfuðborg til landsbyggðanna

Einungis þrír starfsmenn hafa flust búferlum þegar stofnanir hafa verið fluttar á landsbyggð frá höfuðborgarsvæði. Enginn starfsmaður Fiskistofu ætlar sér að flytja til Akureyrar með stofnuninni.

Ekki eru til mörg dæmi um flutning opinberra stofnana í heilu lagi frá höfuðborg til landsbyggða. Stofnanirnar sem hafa verið fluttar eru Skógrækt ríkisins, Veiðistjóraembættið, Landmælingar Íslands og Byggðastofnun. Nú síðast tók ráðherra þá ákvörðun að Fiskistofa yrði flutt á næstu misserum til Akureyrar frá Hafnarfirði.

Mikillar óánægju hefur gætt með slíkar ákvarðanir í hvert skipti sem opinberar stofnanir hafa verið fluttar á landsbyggðirnar. Miklar deilur fylgdu í kjölfar ákvörðunar Steingríms J. Sigfússonar, þáverandi landbúnaðarráðherra, þegar hann ákvað að flytja Skógrækt ríkisins. Aðeins einn starfsmaður flutti með stofnuninni.

Ákvörðun um flutning Veiðistjóraembættisins til Akureyrar var tekin þegar miklar deilur voru uppi milli starfsmanna og ráðherra og var ráðherrann, Össur Skarphéðinsson, sakaður um að hafa flutt stofnunina til að losna við starfsmenn. Enginn þeirra sem áður störfuðu við embættið flutti með stofnuninni.

Sömu sögu má segja um flutning Landmælinga á Akranes og endaði sú ákvörðun Guðmundar Bjarnasonar umhverfisráðherra fyrir Hæstarétti þar sem flutningurinn var dæmdur ólöglegur. Aðeins forstjórinn flutti með stofnuninni á Akranes.

Einn starfsmaður flutti með Byggðastofnun þegar hún var flutt á Sauðárkrók. Valgerður Sverrisdóttir var þáverandi iðnaðarráðherra og ráðherra byggðamála.

Færa má byggðafræðileg rök fyrir því að heppilegast sé að dreifa opinberum störfum vítt og breitt um landið. Að sama skapi hefur verið bent á hagræðið að því að sem flestar stofnanir séu staðsettar sem næst ráðuneytum til að minnka ferðakostnað. Til að mynda hafi rekstrarkostnaður Veiðistjóraembættisins hækkað eftir það flutti til Akureyrar, bæði vegna aðkeyptrar sérfræðiþjónustu sem áður var innan embættisins sem og að ferðakostnaður hafi hækkað við flutninginn.

Sigurður Ingi Jóhannsson, sjávarútvegs- og landbúnaðarráðherra, tilkynnti starfsmönnum síðastliðinn föstudag að flytja ætti stofnunina. Þessi ákvörðun kom eins og blaut tuska framan í starfsmenn sem höfðu ekki hugmynd um áform ráðherra. Vinnubrögðin hafa verið gagnrýnd af starfsmönnum og stéttarfélögum sem telja flutninginn ígildi fjöldauppsagnar hjá stofnuninni.