Real Madrid ákvað að kaupa hvorki skyrtu né buxur

Radamel Garcia, faðir kólumbíska framherjans RadamelsFalcao, sem fór á láni frá Monaco til Manchester United á lokadegi félagaskipta, segir Real Madrid hafa hikað of mikið við kaup á syni sínum og því misst af honum.

Real Madrid var sterklega orðað við kaup á Falcao í allt sumar, en svo fór að hann gekk í raðir Manchester United á lánssamningi sem kostar félagið sex milljónir punda.

„Samningar við Real Madrid gengu ekki upp því ef þú átt pening og ætlar á markaðinn að kaupa þér skyrtu eða buxus þá verðurðu að taka ákvörðun um hvort þú ætlar að kaupa það eða ekki. Real Madrid ákvað að gera það ekki,“ sagði Radamel eldri við útvarpsstöðina LA FM.

„Ég veit ekki hvað málið var. Ég held að Real hafi viljað fá leikmannninn frítt með hinum og þessum skilmálum. Allavega keypti Real sér þær buxur og skyrtur sem það vildi og taldi betri. Við þurfum að sætta okkur við það,“ sagði faðir Falcao og bætti við að fleiri lið höfðu áhuga.

„Félögin sem sýndu honum áhuga voru Juventus, Manchester City, Liverpool og Arsenal. Til allrar lukku fór hann til Manchester United sem er frábært félag. Ég þakka guði fyrir að þetta gekk upp með United.“