Ómögulegt að greina dánarorsök eiganda ferjunnar

Yfirvöld í Suður-Kóreu segjast ekki geta greint dánarorsök auðkýfingsins Yoo Byung-eun, eiganda Sewol-ferjunnar sem sökk í Apríl og kostaði rúmlega þrjú hundruð manns lífið.

Lögregla greindi frá því í síðustu viku að lík sem fannst þann 12. júní síðastliðinn væri af Yoo sem hafði þá lengi verið eftirlýstur í tengslum við ferjumálið. Nú segja hins vegar sérfræðingar sem stóðu að krufningu líksins að ómögulegt sé að komast að því hvað dró hann til dauða.

BBC greinir frá. Að sögn yfirvalda var lík Yoo illa rotnað og engin leið að meta hvort hann hafi hlotið banasár eða dáið úr veikindum. Þó hefur verið útilokað að dánarorsökin hafi verið eitur eða eiturlyf.

Yoo átti fyrirtækið sem rak Sewol-ferjuna sem sökk þann 16. Apríl síðastliðinn. Allir farþegar ferjunnar létu lífið, þar af fjölmargir framhaldsskólanemar. Rannsókn leiddi í ljós að hún var ofhlaðin og að henni hefði verið breytt ólöglega til að geta rúmað fleiri farþega og farangur. Lögregla vildi ná Yoo til yfirheyrslu og hefði hann líklega verið kærður fyrir fjárdrátt og glæpsamlega vanrækslu.

Saksóknarar hafa greint frá því að Yoo slapp við handtöku með því að fela sig í fataskáp á sumarheimili sínu. Lík milljarðamæringsins fannst að lokum á plómuekru í tveggja og hálfs kílómetra fjarlægð frá húsinu ásamt nokkrum áfengisflöskum. Lögregla hefur verið gagnrýnd fyrir að tengja ekki líkið, sem var geymt í líkhúsi í heilar sex vikur, við leitina að Yoo.