Flottara en markið hans Beckhams, Wayne? "Auðvitað!"

Wayne Rooney skoraði eitt af mörkum ársins í ensku úrvalsdeildinni í dag þegar hann þrumaði boltanum nánast frá miðju í markið hjá West Ham á sjöundu mínútu leiksins.

„Þetta eru bara viðbrögð. Ég snéri, sá markvörðinn standa of framarlega og lét vaða. Ég hef reynt þetta mörgum sinnum áður en nú fór boltinn inn og ég er ánægður með það,“ sagði Rooney í viðtali við Sky Sports eftir leikinn.

David Beckham, fyrrverandi leikmaður Manchester United, var á meðal áhorfenda í dag en hann þekkir það vel að skora frá miðju. Beckham gerði það ungur að árum gegn Wimbledon árið 1996 en það var kjörið mark áratugarins í enska boltanum

Jamie Redknapp, sérfræðingur Sky Sports, spurði Rooney hvort þetta mark væri flottara. „Auðvitað!“ svaraði Rooney og hló.

Aðspurður hvort þetta væri flottasta markið sem hann hefði skorað vildi framherjinn ekki gera uppi á milli markanna sinna en hann hefur skorað nokkur glæsileg.

„Þetta er eitt af þeim bestu,“ sagði hann áminntur um mörkin frægu gegn City og Newcastle. „Þetta eru mörk sem maður reynir að skora á æfingum en þetta gengur sjaldnast upp í leikjum. Þegar þetta gengur upp er það gaman,“ sagði Wayne Rooney.

Markið má sjá í spilaranum hér að ofan.