Tyson styður Suarez

„Hann beit einhvern. Svona lagað gerist,“ sagði hnefaleikakappinn Mike Tyson um umtalað atvik sem kom upp í enska boltanum um helgina.

Luis Suarez, leikmaður Liverpool, beit Chelsea-manninn Branislav Ivanovic í leik liðanna um helgina. Það er ekki í fyrsta sinn sem Suarez notar tennurnar en hann fékk níu leikja bann fyrir að bíta andstæðing í leik með Ajax í Hollandi árið 2010.

Tyson sá umræðu um atvikið á Twitter og byrjaði þá að „elta“ Suarez þar. Hann hefur greinilega skilning á málinu enda frægt þegar að Tyson beit hluta af eyra Evander Holyfield í bardaga þeirra árið 1997.

„Ég náði sáttum við Evander og við héldum báðir áfram með líf okkar. Ég er viss um að Suarez muni gera það sama,“ sagði Tyson í útvarpsviðtali í Bandaríkjunum.

„Ég sá þennan Suarez-gaur á þessari Twitter-síðu og ákvað að kanna málið betur,“ sagði Tyson enn fremur.