Stóri Sam biður stuðningsmenn afsökunar

Sam Allardyce, knattspyrnustjóri Blackburn, hefur beðið stuðningsmenn félagsins sem horfðu á leikinn gegn Manchester United í gær afsökunar.

United vann leikinn 7-1 en Stóri Sam vonast að leikmenn sínir þjappi sér saman og snúi blaðinu við um næstu helgi þegar liðið leikur gegn Wolves.

„Ég vil biðja þá stuðningsmenn Blackburn sem ferðuðust til að horfa á þennan leik afsökunar. Það sem þeir urðu vitni að var ekki gott. Þessi varnarleikur sem við sýndum var alls ekki nægilega góður til að hægt sé að keppa við lið með sömu gæði og Manchester United," sagði Allardyce.

„Þeir náðu á endanum að slátra okkur. Það var ekki eitthvað sem við vildum eða bjuggumst við en við þurfum að horfast í augu við staðreyndir. Það sem skiptir mestu máli er hvernig við bregðumst við þessum úrslitum. Sannleikurinn er sá að Manchester United er með betri leikmenn en við."

„Þeir eru hundruðum milljóna punda á undan okkur og miðað við það ættum við ekki að eiga neinn möguleika á sigri. Til að geta átt möguleika verðum við að vera samstilltir og skipulagðir. Stundum tekst það en í þetta skipti gerðist það svo sannarlega ekki."

„Við viljum gera betur fyrir stuðningsmennina. Vonandi náum við því í næstu viku þegar við leikum gegn Úlfunum."