Öll spjót beinast að Írum og Heimi

Írska knattspyrnusambandið hefur sætt mikilli gagnrýni heima fyrir vegna ákvörðunarinnar að spila komandi leiki við Ísrael. Írar spila báða leikina við Ísrael í komandi glugga; í Ungverjalandi þann 27. september (heimaleikur Ísraels) og í Serbíu þann 4. október (heimaleikur Íra).

Írar treystu sér að því er virðist ekki til að fá ísraelska liðið til Írlands, en slíku getur fylgt heljarinnar vesen, líkt og stjórnendur HSÍ fengu að kynnast þegar ísraelska kvennalandsliðið í handbolta kom hingað til lands um árið og leika þurfti fyrir luktum dyrum.

Það sætir einnig gagnrýni að Írar hafi þá ákveðið að spila leikinn við Ísraela í Serbíu af öllum stöðum. Í ljósi þess að stór hluti írsku þjóðarinnar sakar Ísraela um þjóðarmorð og þónokkrir háttsettir Serbar hafi verið dæmdir fyrir slíkt eftir átök í Júgóslavíu á tíunda áratugnum.

Einn þeirra, Ratko Mladic, gjarnan kallaður slátrari Bosníu, var dæmdur fyrir þjóðarmorð og stríðsglæpi en var hylltur sem hetja fyrir fótboltaleik Rauðu stjörnunnar og Partizan í Belgrað á dögunum.

Stór undirskriftarlisti og fyrrverandi landsliðsmenn æfir

Líkt og greint var frá á Vísi í morgun hafa mótmæli verið skipulögð vegna komandi leikja, bæði fyrir utan liðshótel Íra og við híbýli írska knattspyrnusambandsins. Spjót beinast að landsliðinu úr mörgum áttum, innanlands og einnig frá Ísrael.

Yfir 160 írskir atvinnuíþróttamenn, þar á meðal rúgbýmenn, hnefaleikakappar, hjólreiðafólk, körfuboltafólk og frjálsíþróttafólk, hafa undirritað áskorun til írska knattspyrnusambandins og landsliðsmanna Írlands að sniðganga leikinn og neita að mæta Ísraelum.

Einhverjir fyrrverandi landsliðsmenn eru litlu ánægðari með ákvörðun Íra að spila leikinn.

„Írland á ekki að spila við Ísrael. Ekki í Dublin, ekki í Ungverjalandi og klárlega ekki „heimaleik“ í Serbíu. Ekki meðan ísraelskar hersveitir fremja þjóðarmorð. Við sem írsk þjóð, hefðum getað horfst í augu við afleiðingarnar af sniðgöngu saman. Írska knattspyrnusambandið hefði haft allan minn stuðning sem fyrrverandi landsliðsmaður,“ segir goðsögnin Kevin Kilbane sem lék 110 landsleiki fyrir Íra frá 1997 til 2011.

Fyrrverandi landsliðsmaðurinn James McClean er einnig ósáttur.

„Sá einstaklingur í kringum írska liðið sem tekur þátt í leik við Ísrael á að skammast sín. Ég elskaði að klæðast írsku treyjunni, það var mér allt. En þetta er rangt. Þetta er ekki pólitík, þetta er spurning um rétt eða rangt,“ segir McClean sem spilaði 103 landsleiki frá 2012 til 2023.

Ísraelar segja Heimi heimskan

Heimir Hallgrímsson, landsliðsþjálfari Írlands, hefur fallist á þá ákvörðun æðri stjórnenda sambandsins að fara í leikina við Ísrael og situr í þeirri erfiðu stöðu að þurfa sem þjálfari liðsins að svara fyrir það.

Hann hefur sagt óþægindi gera vart við sig hjá flestum í leikmannahópi Írlands vegna komandi leikja og hann hringdi í hvern einasta mann sem hann valdi í hópinn fyrirfram til að athuga hvort viðkomandi treysti sér til að spila við Ísraelana.

Aðspurður um það hvort Írland stæði með þjóðarmorði Ísraela með því að spila við þá sagði Heimir í gær:

„Við erum ekki að spila með þjóðarmorði, við erum að spila gegn þjóðarmorði. Við erum að spila gegn Ísrael, við erum ekki að spila með Ísrael.“

Þau ummæli drógu dilk á eftir sér þar sem Ísraelar eru æfir. Harðorð yfirlýsing knattspyrnusamband landsins í gær sakaði Heimi um „fáfræði, hræsni og heimsku“.

Í aðdraganda leikjanna hefur Heimir þá bent á þá andstæðu í nálgun alþjóðaknattspyrnusambanda að heimila Ísraelum þátttöku á meðan Rússum er meinuð þátttaka sökum innrásar þeirra í Úkraínu.

Írar sendu þá beiðni til UEFA þess efnis að þeir myndu aldrei aftur dragast gegn Ísraelum í keppnisleikjum sökum þess fjaðrafoks sem orðið hefur vegna komandi leikja.

UEFA hafnaði þeirri beiðni.