Bon Jovi skemmir fyrir Evrópuævintýri Man City

Enska úrvalsdeildarliðið Manchester City hefur átt misjöfnu gengi að fagna í vetur. Liðið fékk þó þau góðu tíðindi á dögunum að það fengi sæti í Evrópukeppni félagsliða vegna prúðmennsku.

Reyndar voru sex lið í Evrópu prúðari en City, en enska liðið var það eina af þeim sem ekki var þegar búið að tryggja sér sæti í Evrópukeppni í gegn um deildarkeppnina.

Eini gallinn við þetta er sá að City getur ekki spilað fyrsta leik sinn í forkeppninni á heimavelli sínum, borgarleikvanginum í Manchester, því hann hefur þegar verið bókaður undir tónleika bandarísku rokkhljómsveitarinnar Bon Jovi. Breska blaðið Times greindi frá þessu.

Rokksveitin spilar á heimavelli City þann 22. júní og því verða forráðamenn City að finna annan völl til að spila leikinn. Heimavöllur granna þeirra í Manchester United kemur ekki til greina, því hann er þegar bókaður undir aðra viðburði.

Nokkur óvissa ríkir í herbúðum City þessa dagana og enn er ekki komið á hreint hvort Sven-Göran Eriksson knattspyrnustjóri heldur starfi sínu eða ekki.