Wenger ætlar ekki að kaupa stórstjörnur

Arsene Wenger, stjóri Arsenal, segist ekki ætla að eltast við stór nöfn á leikmannamarkaðnum í sumar.

Stuðningsmenn Arsenal hafa kallað á að félagið kaupi heimsklassa leikmenn inn í liðið til að brúa bilið milli efnilegra ungliða Wengers og telja að það sé það sem uppá vantaði í vetur þegar liðið náði ekki að vinna titil þrátt fyrir að spila fallega knattspyrnu.

En Wenger trúir ekki að stórstjörnur leysi neinn vanda fyrir félagið.

"Ég vil frekar hafa stóran leikmann í mínum herbúðum en stórt nafn. Það er fullt af stórum nöfnum í fótboltanum í dag sem eru ekki að gera neitt af viti. Það er eitthvað af góðum leikmönnum sem hafa áhuga á að spila með okkur í augnablikinu og við hefðum gott af því að bæta tveimur eða þremur góðum leikmönnum í hópinn fyrir næsta ár," sagði Wenger.

Wenger hefur verið gagnrýndur nokkuð fyrir að einblína á unga og efnilega leikmenn þegar hann fær nýja menn til Arsenal, en hann vék sér undan þegar hann var spurður hvort hann ætlaði að kaupa unga eða reynda leikmenn í sumar.

"Okkur vantar fyrst og fremst hæfileikaríka knattspyrnumenn," sagði Wenger.