Juventus að bjóða í Lampard?

Ítalska blaðið Gazzetta dello Sport greinir frá því í dag að fulltrúi ítalska félagsins Juventus sé nú í Lundúnum þar sem hann sé að leggja fram formlegt kauptilboð í Frank Lampard hjá Chelsea.

Blaðið segir að Alessio Secco, yfirmaður knattspyrnumála hjá Juventus, sé nú staddur í London og ætli að bjóða um 9 milljónir punda í enska landsliðsmanninn.

Samningur Lampard rennur út árið 2009 og ítalska blaðið heldur því fram að hann sé ekki á þeim buxunum að framlengja samning sinn við þá bláu.

Það er Claudio Ranieri sem þjálfar Juventus og hann þekkir Lampard vel frá því þeir störfuðu saman hjá Chelsea áður en Jose Mourinho tók þar við. Gazzetta segir að Lampard muni þurfa að taka á sig launalækkun upp á um eina milljón punda á ári ef hann ákveði að ganga í raðir Juventus.