Megson fékk stig í fyrsta leiknum með Bolton

Lærisveinar Gary Megson hjá Bolton máttu sætta sig við 1-1 jafntefli við Aston Villa í fyrsta leiknum í ensku úrvalsdeildinni í dag þar sem umdeilt mark tryggði gestunum stig í síðari hálfleik.

Þetta var fyrsti leikur Megson við stjórnvölinn hjá Bolton og fór ráðning Megson misvel í stuðningsmenn liðsins. Aðeins um 11 þúsund manns mættu þannig á leikinn á Reebok í dag.

Nicolas Anelka kom Bolton yfir með marki úr aukaspyrnu og liðið vildi fá tvær vítaspyrnur í leiknum. Bolton var ívið betra liðið í fyrri hálfleiknum.

Í síðari hálfleik var meira líf í leikmönnum Villa, en umdeilt atvik varð til þess að Gabriel Agbonlahor komst inn fyrir vörn Bolton og gaf á Luke Moore sem jafnaði metin. Línuvörðurinn hafði þá flaggað að Bolton ætti að fá innkast en Martin Atkinson dómari gaf Villa innkastið og upp úr því skoraði Villa.