Oscar á leið til Kína fyrir morðfjár

Brasilíski fótboltamaðurinn Oscar, sem leikur með Chelsea í ensku úrvalsdeildinni, er á leið til kínverska úrvalsdeildarliðsins Shanghai SIPG fyrir 52 milljónr punda eða því sem nemur 7,3 milljörðum króna. Frá þessu greinir Daily Mail.

Oscar, sem er 25 ára gamall sóknarsinnaður miðjumaður, kom til Chelsea frá Internacional í heimalandinu árið 2012. Hann hefur síðan þá spilað 203 leiki, skorað 38 mörk og lagt upp önnur 37. Brassinn hefur verið einn af lykilmönnum Chelsea undanfarin ár en á síðustu leiktíð spilaði hann 27 leiki Chelsea í ensku úrvalsdeildinni, sjö í Meistaradeildinni og fjóra í bikarnum. Tækifærunum hefur farið fækkandi á þessu tímabili.

Hann var í byrjunarliði Chelsea undir stjórn Antonio Conte til að byrja með á leiktíðinni. Oscar byrjaði fyrstu fimm leikina í ensku úrvalsdeildinni en eftir 2-1 tap gegn Liverpool í fimmtu umferð hefur hann ekki byrjað leik. Oscar hefur síðan þá aðeins komið við sögu í fjórum af tíu leikjum Chelsea og ekki spilað í heildina nema 36 mínútur af síðustu 900 í deildinni.

Brassinn virðist ætla að vera næsta stjarna sem kínverska úrvalsdeildarfélag kaupir fyrir morðfjár en þangað hafa farið leikmenn á borð við Jackson Martínez, Ezequiel Lavezzi, Ramires og Alex Teixeira á undanförnum mánuðum.

Oscar mun hitta aðra slíka stjörnu, samlanda sinn Hulk, hjá Sjanghæ-liðinu en hann var keyptur þangað á svipaða upphæð í sumar. Hulk fær greiddar 20 milljónir evra árlega fyrir störf sín í Kína. Liðið þjálfar Portúgalinn André Villas-Boas sem áður stýrði Porto, Chelsea, Tottenham og Zenit frá Pétursborg.

Shanghai SHIP hafnaði í þriðja sæti kínversku úrvalsdeildarinnar á síðustu leiktíð.