Vaktin: Austanbylur annan í páskum

Fyrstu viðvaranir tóku gildi klukkan 7 í morgun á Suðurlandi þar sem djúp lægð nálgast úr suðvestri og veldur austan byl í dag, fyrst sunnan heiða. 

Veðurviðvaranir munu ná til allra landshluta þar sem búast má við austanvindi upp á 15-28 m/s með snörpum vindhviðum. Einnig má búast við snjókomu eða skafrenningi með slæmu skyggni og versnandi færð. Er þetta varasamt ferðaveður.

Upp úr hádegi verða viðvaranirnar á Suðurlandi færðar upp á appelsínu gult og um klukkan 13 taka gular viðvaranir gildi á höfuðborgarsvæðinu og síðan á Norðurlandi, Vesturlandi og Austurlandi. Faxaflói verður færður upp á appelsínugult klukkan 14.

Það á samt að hlýna smám saman, samkvæmt hugleiðingum veðurfræðings á Veðurstofu Íslands. Seint í dag fer úrkoman yfir í slyddu eða rigningu sunnantil og í nótt styttir upp norðanlands.

Ef vaktin birtist ekki hér að neðan er ráð að endurhlaða síðuna (Ctrl. + R).