Hægri hönd Selenskís kynnist Trump-liðum

Þá á hann einnig funda með þeim Keith Kellogg, sem Trump hefur gert að sérstökum erindreka sínum gagnvart Rússlandi og Úkraínu, og Mike Waltz, verðandi þjóðaröryggisráðgjafa Trumps, samkvæmt heimildarmönnum Wall Street Journal.

Trump hét því ítrekað í kosningabaráttunni á þessu ári að hann myndi binda enda á stríðið innan við sólarhring eftir að hann tekur embætti þann 20. janúar, ef ekki áður. Hann hefur þó ekki sagt hvernig hann ætlar sér það.

Vilja kynnast nýrri ríkisstjórn

Markmið Jermaks er að kynnast fólkinu sem mun koma til með að stjórna í Washington og hafa gífurleg áhrif á framgang stríðsins í Úkraínu og í Rússlandi á næstu mánuðum og til lengri tíma.

Eins og fram kemur í frétt miðilsins hefur Kellogg gefið til kynna að hann styðji viðleitni ríkisstjórnar Joes Biden varðandi það að senda mikið magn hergagna til Úkraínu, þar sem það gæti styrkt stöðu Trumps þegar kemur að mögulegum friðarviðræðum milli Úkraínumanna og Rússa.

Sjá einnig: Danska leiðin vekur lukku meðal bakhjarla Úkraínu

Úkraínumenn hafa sent frá sér merki um að þeir séu tilbúnir til viðræðna en ekki má greina slíkt frá ráðamönnum í Rússlandi. Eins og Vladimír Pútín, forseti Rússlands, hefur sjálfur sagt. Hann hefur sagt að áður en viðræður geti hafist þurfi Úkraínumenn að gefa eftir töluvert meira landsvæði en Rússar hafa hernumið og þurfa sömuleiðis að slá aðild að NATO alfarið af borðinu, svo eitthvað sé nefnt.

Ráðgjafar Trumps hafa talað um áætlanir um að Úkraínumenn gefi hernumin svæði eftir í skiptum fyrir frið og fái sömuleiðis ekki inngöngu í NATO. Það er eitthvað sem Úkraínumönnum lýst verulega illa á.

Í greiningu Reuters á mögulegum ætlunum Trump-liða kemur fram að ein leið sé að hóta að binda enda á hernaðaraðstoð til Úkraínumanna og fá Úkraínumenn þannig að samningaborðinu. Þá gæti Trump hótað því að auka stuðning við Úkraínumenn til muna til að fá Pútín að borðinu.

Selenskí hefur gefið í skyn að hann sé tilbúinn til að samþykkja að láta landsvæði af hendi í skiptum fyrir frið, ef Úkraína fær aðild að Atlantshafsbandalaginu. Utanríkisráðherra Úkraínu sló á svipaða strengi í gær og sagði að það væri eina öryggisráðstöfunin sem Úkraínumenn gætu sætt sig við að svo stöddu.

Ráðstafanir nauðsynlegar

Eins og áður hefur komið fram snýr vandamál Úkraínumanna, í þeirra eigin augum, að því hversu varanlegt mögulegt friðarsamkomulag við Rússa getur verið. Ráðamenn í Úkraínu hafa sagt að í skiptum fyrir að gefa eftir landsvæði þurfi þeir góðar og bindandi öryggisráðstafanir og er aðild að Atlantshafsbandalaginu efst á lista þeirra.

Sjá einnig: Játar að hafa ekki afl til að taka aftur hernumdu svæðin

Án slíkra ráðstafana er fátt sem kemur í veg fyrir að Rússar byggi upp her sinn að nýju á nokkrum árum og geri aftur innrás í Úkraínu. Rússar væru í betri stöðu en Úkraínumenn til að byggja upp efnahag sinn og her á nýjan leik, vegna þeirra miklu skemmda sem árásir Rússa hafa valdið í Úkraínu.

Erfitt gæti verið fyrir Úkraínu að stöðva aðra innrás við slíkar kringumstæður.

Sjá einnig: Tóku tíu úkraínska fanga af lífi

Verði Úkraínumenn þvingaðir til óhagstæðs friðarsáttmála sem gæti leitt til nýs stríðs á komandi árum eru miklar líkur á því að þær milljónir manna sem hafa flúið land, og þar er að mestu um konur og börn að ræða, snúi aldrei aftur heim.

Talið er að um 6,7 milljónir hafi flúið land og er úkraínska ríkinu nauðsynlegt að margt af þessu fólki snúi aftur.

Einn heimildarmanna WSJ ítrekaði það í samtali við miðilinn að friðurinn þyrfti að vera varanlegur.

„Óstöðugur og tímabundinn friður þjónar hvorki hagsmunum Bandaríkjanna né Úkraínu.“

Svaraði ekki spurningum um aðild

Mark Rutte, nýr framkvæmdastjóri NATO, var á þriðjudaginn spurður um mögulega aðild Úkraínu að NATO en kom sér undan því að svara með beinum hætti. Þess í stað sagði hann að leggja þyrfti áherslu á að styrkja varnir Úkraínumanna og efla stöðu þeirra fyrir mögulegar friðarviðræður.

Víglínan væri að færast hægt til vesturs og það þyrfti að stöðva. Með því að styrkja stöðu Úkraínumanna gætu þeir sjálfir ákveðið framhaldið og þá hvort hefja ætti friðarviðræður og hvernig ætti að framkvæma þær.

Sjá einnig: Við­ræðurnar snerust um uppgjöf, ekki frið

Leiðtogar NATO lýstu því yfir á fundi þeirra í sumar að Úkraína yrði óhjákvæmilega aðili að bandalaginu. Einhverjir eru þó mótfallnir inngöngu ríkisins á meðan stríðið stendur yfir og er samþykka allra aðildarríkja nauðsynlegt fyrir inngöngu ríkis.