Þetta segir í tilkynningu á vef Veðurstofu Íslands. Þar segir að nú í morgunsárið taki úrkomuákefð að aukast og gert sé ráð fyrir um 150 millimetra úrkomu á sólarhring en meira en 300 millimetrum á 48 tímum, þar sem mest verður fyrir austan.
Vatnshæð í borholum á Eskifirði og Seyðisfirði sé mjög lág eftir sumarið en létt rigning undanfarna daga hafi gert það að verkum að efsti hluti jarðvegarins er ekki alveg þurr.
Því ætti jarðvegurinn að geta tekið vel við nokkru magni af úrkomu en úrkomuákefð hafi talsverð áhrif á það hvort vatn nær að hripa niður í jarðveginn en þurr jarðvegur hafi tilhneigingu til að taka verr við ákafri úrkomu.
Hitastig sé enn þá vel yfir frostmarki og gert sé ráð fyrir að það rigni í fjöll þó gæti sliddað í allra efstu tinda. Gera megi ráð fyrir að mesta úrkoman falli til fjalla og valdi vatnavöxtum í farvegum en líkur á aurskriðum aukist við þær aðstæður.
