Liverpool nær varla í tvö lið á æfingum: „Augljóslega ekki í lagi“

Það er ekkert nýtt að Keïta sé meiddur en hann hefur glímt við ítrekuð meiðsli frá því að hann var keyptur til Liverpool frá RB Leipzig sumarið 2018 fyrir rúmar 50 milljónir punda. Af þeim sökum hefur hann spilað mismikið fyrir liðið og aldrei náð að festa sig í sessi.

Hann hafði tækifæri til þess í ljósi mikilla meiðsla hjá félaginu, sér í lagi í hans stöðu á miðsvæðinu, en óvíst er um hversu alvarleg meiðsli er að ræða. Keïta er níundi leikmaðurinn á meiðslalista Liverpool.

Miðverðirnir Ibrahima Konaté og Joël Matip eru báðir frá, sem og miðjumennirnir Curtis Jones, Alex Oxlade-Chamberlain og Thiago Alcantara. Þá eru Diogo Jota, Caoimhin Kelleher og Calvin Ramsey einnig meiddir, auk þess sem nýliðinn Darwin Nunez á tvo leiki eftir af þriggja leikja banni sínu eftir að hafa fengið rautt spjald gegn Crystal Palace í síðustu viku.

Þjálfaranum Jürgen Klopp líst illa á stöðuna.

„Naby var meiddur. Við þurfum að meta meiðslin en það lítur ekki út fyrir að hann æfi á morgun [í dag, þriðjudag]. Kannski vitum við meira þá en ég er ekki viss,“ sagði Klopp eftir leik í gær.

„Þetta var ekki auðvelt í vikunni þar sem við erum með 15 heila aðalliðsleikmenn á æfingu. Það er augljóslega ekki í lagi,“ sagði Þjóðverjinn enn fremur.

Liverpool hefur farið illa af stað í ensku úrvalsdeildinni en liðið er aðeins með tvö stig eftir tap fyrir Manchester United í gær. Áður gerði liðið 2-2 jafntefli við Fulham og 1-1 jafntefli við Crystal Palace.

Næsti leikur liðsins er við Bournemouth á Anfield á laugardaginn.