Erlent

Mestu þurrkar Evrópu í fimm hundruð ár

Samúel Karl Ólason skrifar
Gæs leitar að vatni á botni Velence-vatns í Ungverjalandi.
Gæs leitar að vatni á botni Velence-vatns í Ungverjalandi. AP/Anna Szilagyi

Lítið sem ekkert hefur rignt í Vestur-, Suður- og Mið-Evrópu í tæpa tvo mánuði. Veðurfræðingar búast ekki við rigningu á næstunni og hefur þurrkunum verið lýst sem þeim verstu í heimsálfunni í fimm hundruð ár.

Loftslagsbreytingar hafa gert ástandið verra þar sem meiri hiti hraðar uppgufun og þyrstar plöntur drekka meira. Minni snjókoma á veturna hefur sömuleiðis dregið úr ferskvatnsbirgðum yfir sumartímann.

Vatnsból eru að tæmast víða og árfarvegir hafa þurrkað upp. Vatnsstaða í stærstu ám Evrópu er líka víða mjög lítil. Ástandið hefur sömuleiðis haft gífurleg áhrif á landbúnað víða um heimsálfuna.

Þurrkur er í nærri því helmingi Evrópu og búast sérfræðingar við svipuðu ástandi næstu þrjá mánuði.

Yfirvöld í Frakklandi segja þurrkana vera þá verstu frá því byrjað var að halda formlega utan um þá.AP/Nicholas Garriga

Samkvæmt frétt AP fréttaveitunnar er Evrópa ekki eina heimsálfan þar sem þurrkar gera íbúum lífið leitt. Ástandið er einnig verulega slæmt í vesturhluta Bandaríkjanna, Mexíkó og Austur-Afríku.

Blaðamaður fréttaveitunnar sótti þorpið Lux í Frakklandi heim. Áin Tille rennur þar í gegn, við hefðbundnar aðstæður en nú er árfarvegurinn þurr og er þar ekkert annað að finna en dauða fiska. Jean-Philippe Couasné, yfirmaður náttúruverndarsamtaka á svæðinu, sagði að rennsli árinnar væri að meðaltali átta þúsund lítrar á sekúndu. Nú væri það núll.

Beinagrind fisks liggur á þurrum botni vatns stöðuvatns í Serbíu.AP/Darko Vojinovic

Þetta ástand feli í sér að fiskategundir muni hverfa úr ánni. Fiskar hafi fundið skjól ofar í ánni en allt sé dautt neðar í ánni.

Guardian sagði frá því í morgun að miðillinn hefði heimildir fyrir því að yfirvöld í Englandi myndu brátt lýsa formlega yfir þurrki í átta af fjórtán héruðum landsins. Það fæli í sér að vatn yrði skammtað í þeim héruðum.

Mögulega yrði bannað að þvo bíla, hús og annað með vatni og notkun úðara gæti sömuleiðis verið bönnuð.

Galardi áin í suðvestur Frakklandi er svo gott sem tóm. Þessi mynd var tekin þann 12. júlí og lítið hefur rignt á svæðinu síðan þá.AP/Bob Edme

Veikari skotvindar

Vatnsból hafa lækkað verulega og ár eru sömuleiðis að þorna upp víða. Sérfræðingar óttast að ástandið muni svo versna áfram á næstu árum ef rigning aukist ekki til muna og til lengri tíma.

Sérfræðingar sem AP ræddi við segja loftslagsbreytingar hafa dregið úr hitamuni milli mismunandi svæða jarðarinnar. Það hafi meðal annars dregið úr krafti skotloftavinda (e. jet stream) sem flytja meðal annars rakt loft frá Atlantshafinu yfir Evrópu.

Veikara streymi skotvinda veldur því einnig að heitt loft getur auðveldar borist norður frá Afríku og kalt loft suður frá Norðurskautinu.

Bátar liggja á þurru í Velence í Ungverjalandi. Vatnsstaða í stærstu ám Evrópu hefur lækkað mikið.AP/Anna Szilagyi
Þurrkarnir, sem eru þeir verstu í manna minnum í Frakklandi, hafa mikil áhrif á landbúnað og matvælaframleiðslu.AP/Daniel Cole

Hér að neðan má sjá ástandið í Po, lengstu á Ítalíu.


Tengdar fréttir

Tala látinna fer hækkandi og um­fangs­mikil leit stendur yfir

Að minnsta kosti nítján hafa látist í flóðum í Appalachiafjöllum í Bandaríkjunum, þar á meðal sex börn. Ríkisstjóri Kentucky-héraðs gerir ráð fyrir því að tala látinna fari hækkandi og umfangsmikil leit stendur enn yfir.

Spá enn fleiri hitametum í Evrópu í dag

Ekkert lát virðist ætla að verða á ofsahita í Evrópu og er búist við því að enn fleiri hitamet falli í dag, meðal annars í Danmörku en mesti hiti sem hefur mælst þar í landi er 36,4 gráður.

Met féllu í hrönnum þegar söguleg hitabylgja gekk yfir Bretland

Eldar loguðu í Lundúnum í dag í mestu hitabylgju sem gengið hefur yfir Bretland og fór hitinn þar í fyrsta sinn í sögu landsins yfir 40 gráður. Miklir skógareldar geisa enn víða í suðvestanverðri Evrópu. Framkvæmdastjóri hjá Alþjóðaveðurfræðistofnuninni vonar að hitabylgjan ýti við stjórnmálamönnum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.