Valsmenn töpuðu 3-2 fyrir ÍBV í Vestmannaeyjum í gær og það reyndist síðasti leikur þeirra undir stjórn Heimis. Eftir vonbrigðatímabil í fyrra þar sem Valur missti af sæti í Evrópukeppni situr liðið aðeins í 5. sæti eftir 13 umferðir í sumar, með 20 stig og nú þegar fjórtán stigum á eftir toppliði Breiðabliks.
Heimir Guðjónsson lætur af störfum hjá Knattspyrnufélaginu Val.
— ValurFotbolti (@Valurfotbolti) July 18, 2022
Knattspyrnufélagið Valur þakkar Heimi Guðjónssyni fyrir hans störf og óskar honum velfarnaðar í framtíðinni. pic.twitter.com/rBf9tFKIo0
Fótboltadoktorinn Hjörvar Hafliðason segir frá því á Twitter að Ólafur Jóhannesson, sem rekinn var úr starfi sem þjálfari FH fyrr í sumar, sé mættur á Hlíðarenda og því ekki útilokað að Ólafur taki á nýjan leik við Val eftir að hafa hætt haustið 2019 þegar samningur hans við félagið var ekki endurnýjaður.
Óli Jó er núna niðrá Hlíðarenda.
— Hjörvar Hafliðason (@hjorvarhaflida) July 18, 2022
Heimir tók við Val af Ólafi eftir tímabilið 2019 og sneri þá heim til Íslands eftir að hafa stýrt HB í Færeyjum, sem hann gerði bæði að Færeyjameistara og bikarmeistara. Undir stjórn Heimis varð Valur Íslandsmeistari árið 2020.
Heimir gerði á sínum tíma samning til fjögurra ára við Val, sem þar með átti að gilda út tímabilið 2023, en nú er ljóst að hann mun ekki þjálfa liðið áfram.
