Minnst 94 farist í brasilísku borginni Petrópolis

Búið er að lýsa yfir neyðarástandi í borginni þar sem fjöldi húsa í hlíðum eru að hruni komin. Talið er að um áttatíu heimili hafi orðið fyrir skemmdum í því hverfi sem hefur farið einna verst út úr hamförunum.

Myndbönd sem deilt hefur verið á samfélagsmiðlum sýna mikla eyðileggingu og bíla fljóta um götur borgarinnar. Björgunarteymi leita nú að eftirlifendum í aurnum og hafa íbúar líkt stöðunni við stríðsástand, að því er fram kemur í frétt BBC. 

Jair Bolsonaro, forseti Brasilíu, hefur gefið út að stjórnvöld muni veita íbúum skjóta aðstoð en hann er nú staddur í opinberri heimsókn í Rússlandi.

Yfir 180 hermenn hafa verið sendir á svæðið auk sérhæfðra leitarteyma. Petrópolis er vinsæll ferðamannastaður en staðsetning borgarinnar gerir það að verkum að skriðuföll hafa ítrekað leikið íbúa grátt. Þegar verst lét árið 2011 fórust yfir 900 manns í Petrópolis og nærliggjandi borgum vegna aurskriða.