Yfirvöld í Ísrael leggja drög að bólusetningu með fjórða skammtinum

Stjórnvöld gáfu fyrirmæli um að hefja undirbúningin eftir að sóttvarnasérfræðingar mæltu með því að einstaklingar 60 ára og eldri og heilbrigðisstarfsmenn fengju fjórða skammtinn.

Samkvæmt heilbrigðisráðuneyti landsins hafa að minnsta kosti 340 greinst með ómíkron og einn lést með afbrigðið í gær.

Talsmenn forsætisráðherrans Naftali Bennett sögðust gera ráð fyrir að fólki yrði boðinn fjórði skammturinn þegar að minnsta kosti fjórir mánuðir væru liðnir frá þriðja skammti. 

Þrátt fyrir að hafa verið meðal fyrstu ríkja heims sem fengu nóg bóluefni til að bólusetja alla þjóðina hafa aðeins um 63 prósent íbúa verið fullbólusettir, það er að segja fengið tvo skammta. 

Ástæðan er meðal annars sú að um þriðjungur þjóðarinnar er yngri en 14 ára en yfirvöld tilkynntu í nóvember að börnum eldri en 5 ára yrði boðin bólusetning.

Stjórnvöld hafa þegar sett á ferðabann til fjölda ríkja til að hamla útbreiðslu ómíkron-afbrigðisins, meðal annast til Bandaríkjanna, Kanada, Þýskalands og Ítalíu.

Um 1,36 milljónir manna hafa greinst með Covid-19 í Ísrael og um 8.200 látist.