Enski boltinn

Chilwell gæti verið frá út tímabilið

Hjörtur Leó Guðjónsson skrifar
Ben Chilwell var tekinn af velli í stórsigri Chelsea í gær vegna meiðsla. Óttast er að hann gæti misst af því sem eftir er af tímabilinu.
Ben Chilwell var tekinn af velli í stórsigri Chelsea í gær vegna meiðsla. Óttast er að hann gæti misst af því sem eftir er af tímabilinu. Chris Brunskill/Fantasista/Getty Images

Ben Chilwell, vinstri bakvörður enska knattspyrnufélagsins Chelsea, gæti verið frá út tímabilið eftir að leikmaðurinn fór af velli í 4-0 stórsigri liðsins gegn Juventus í Meistaradeild Evrópu í gær.

Óttast er að Chilwell hafi orðið fyrir meiðslum á fremra krossbandi, en leikmaðurinn fann til í hnénu í leiknum í gær og var tekinn af velli þegar tæpar tuttugu mínútur voru til leiksloka.

Hann fer í myndatöku í dag og í kjölfarið á því verður hægt að meta hversu alvarleg meiðslin eru. Ef rétt reynist að fremra krossbandið hafi skaddast þá gæti þessi 24 ára bakvörður misst af restinni af tímabilinu.

Eftir sigur liðsins í gær sagðist Thomas Tuchel, stjóri Chelsea, hafa áhyggjur af stöðu mála hjá bakverðinum unga. Sérstakelga þar sem hann hefur verið sjóðheitur undanfarið, líkt og Reece James í hægri bakverðinum.

„Þeir hafa báðir verið með mikið sjálfstraust og mikil gæði upp á síðkastið,“ sagði Tuchel. „Chilwell var sárþjáður en honum líður betur núna. Við verðum að krossa fingur og vona að meiðslin séu ekki of alvarleg.“

Þá fór N'Golo Kante einnig af velli í gær vegna hnémeiðsla og hann gæti misst af stórleik Chelsea gegn Manchester United næstkomandi sunnudag.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.