Í yfir­lýsingu frá nefndinni í dag segir að Shuai hafi rætt við Thomas Bach, for­seta nefndarinnar, og nokkra stjórnar­menn hennar í um hálf­tíma í dag.

„Henni sagðist líða vel og að hún væri örugg á heimili sínu í Peking en að hún vilji að hennar einka­líf verði virt á þessum tíma­punkti,“ segir í yfir­lýsingunni.

„Þess vegna vill hún vera með vinum sínum og fjöl­skyldu ein­mitt núna. Hún mun samt sem áður halda á­fram í tennis, greininni sem hún elskar svo mikið.“

Óttuðust um Shuai

Margir hafa haft gríðar­legar á­hyggjur af Shuai frá því að hún birti færsluna en henni var eytt út af kín­verska sam­fé­lags­miðlinum, sem er rit­skoðaður af kín­verska ríkinu. Öllum upp­lýsingum um hana var síðan eytt af inter­netinu í kjöl­farið.

Al­þjóða­tennis­sam­bandið og á­hrifa­fólk um heim allan hefur þrýst á Kín­verja að bregðast við á­sökunum Shuai og koma með hald­bærar sannanir um að hún sé örugg. Sam­bandið gekk svo langt að hóta því að draga sig úr öllum keppnum sem haldnar væru á kín­verskri grundu ef ekkert heyrðist frá Shuai.

Það var svo í dag að Al­þjóða­ólympíu­sam­bandið fékk loks að heyra frá Shuai, sem leið vel að eigin sögn.

„Mér var mjög létt að sjá að það væri í lagi með Peng Shuai, en það var okkar aðal­á­hyggju­efni að svo væri ekki,“ er haft eftir einum stjórnar­manni nefndarinnar í yfir­lýsingunni.