Erlent

Sigldu á ó­þekkt neðan­sjávar­fjall

Samúel Karl Ólason skrifar
USS Connecticut í höfn í Japan í sumar.
USS Connecticut í höfn í Japan í sumar. AP/Brett Cote

Kafbátnum USS Connecticut var siglt á neðansjávarfjall sem hafði aldrei verið kortlagt. Minnst tólf sjóliðar slösuðust og kjarnorkukafbáturinn skemmdist töluvert þegar honum var siglt á fjallið í grennd við Suður-Kínahaf í upphafi síðasta mánaðar.

Í stuttri yfirlýsingu sem forsvarsmenn Sjöunda flota Bandaríkjanna, sem er starfræktur í vesturhluta Kyrrahafs, birtu í gær segir að rannsókn hafi farið fram og þetta hafi verið niðurstaðan. Í kjölfarið verði skoðað hvort einhver beri ábyrgð á slysinu og hvort grípa eigi til einhverskonar aðgerða.

Enginn slasaðist alvarlega í slysinu og kjarnakljúfur kafbátsins er sagður í góðu lagi. Kafbáturinn er nú á Gvam þar sem verið er að gera við hann.

Sjá einnig: Tólf bandarískir sjóliðar slasaðir eftir árekstur við óþekktan hlut

Kínverjar hafa gert ólöglegt tilkall til nánast alls Suður-Kínahafs. Þar hafa þeir byggt upp heilu eyjarnar, flugvelli og flotastöðvar og komið eldflaugum þar fyrir. Auk Kína gera Víetnam, Filippseyjar, Brúnei, Malasía, Indónesía og Taívan tilkall til svæðisins. Rík fiskimið eru í Suður-Kínahafi og talið er að þar sé einnig að finna auðlindir eins og olíu. Þar að auki liggja mikilvægar siglingaleiðir um svæðið.

Bandaríkin hafa haldið siglingum sínum um svæðið áfram í mótmælaskyni við tilkall Kína og til að tryggja frjálsar siglingar um svæðið. Ráðamenn í Kína hafa reglulega fordæmt þessar siglingar og sagt þær ógna friði á svæðinu.

Spenna milli Bandaríkjanna og Kína hefur aukist mikið að undanförnu og þá miklu leyti vegna bæði tilkalls Kína til Suður-Kínahafs og hernaðaruppbyggingarinnar þar annars vegar, og vegna Taívan hins vegar.

Heita því að ná stjórn á Taívan

Kínverjar segja Taívan tilheyra Kína en árið 1949 flúðu þjóðernissinna til eyjunnar undan kommúnistum í borgarastyrjöld landsins. Forsvarsmenn Kommúnistaflokksins hafa heitið því að ná völdum í Taívan, með valdi ef nauðsynlegt sé.

Xi Jinping, forseti Kína, hefur sagt það „óhjákvæmilegt“ að Taívan verði hluti af Kína.

Taívanar segjast sjálfstæðir og segjast ætla að verja frelsi þeirra og lýðræði. Sjálfstæðissinnum hefur vaxið ásmegin í Taívan á undanförnum árum en Taívanar hafa aldrei lýst yfir formlegu sjálfstæði.

Ríkisstjórn Bandaríkjanna hefur heitið því að koma Taívan til aðstoðar geri Kínverjar innrás og það hafa yfirvöld í Japan gert sömuleiðis.

Vilja Taívan í Sameinuðu þjóðirnar

Anthony Blinken, utanríkisráðherra Bandaríkjanna, kallaði eftir því í síðustu viku að Taívan fengi aukið aðgengi að Sameinuðu þjóðunum. Ráðamenn í Kína brugðust reiðir við því en Kínverjar hafa lengið komið í veg fyrir aðgang Taívans að alþjóðasamfélaginu.

Talsmaður utanríkisráðuneytis Kína sagði að Bandaríkin væru að leika sér að eldinum með Taívan og málefnið ógnaði stöðugleika og friði í Kyrrahafinu.


Tengdar fréttir

Biden segir Bandaríkin munu verja Taívan fyrir innrás

Joe Biden Bandaríkjaforseti segir ljóst að Bandaríkjamenn muni verja eyjuna Taívan, ef Kínverjar gera innrás. Þetta kom fram í svörum hans á borgarafundi sem CNN sjónvarpsstöðin stóð fyrir.

Æfðu að lenda hermönnum á strönd skammt frá Taívan

Her Kína hélt nýverið æfingar í að lenda hermönnum af sjó. Þær æfingar voru gerðar í héraðinu sem er andspænis Taívan. Æfingarnar hafa þó ekki verið beintengdar mjög aukinni spennu milli Kína og Taívans.

Heitir því að Taí­van verði sam­einað Kína á ný

Xi Jinping forseti Kína hefur heitið því að Taívan muni „sameinast“ Alþýðulýðveldinu Kína að nýju. Forsetinn sagðist í dag, laugardag, vona að sameiningin takist án þess að beita þurfi valdi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.