Veður

Bætir aftur í vind í kvöld og stormur víða á morgun

Atli Ísleifsson skrifar
Hiti á landinu verður á bilinu þrjú til ellefu stig þar sem hlýjast verður syðst. Á Vestfjörðum verður þó norðaustan átján til 23 metrar á sekúndu með slyddu og hita núll til þrjú stig.
Hiti á landinu verður á bilinu þrjú til ellefu stig þar sem hlýjast verður syðst. Á Vestfjörðum verður þó norðaustan átján til 23 metrar á sekúndu með slyddu og hita núll til þrjú stig. Veðurstofan

Mildur loftmassi hefur nú náð yfir landið eftir hina hvössu austanátt sem herjaði á landann í gær. Búast má við austan strekkingi með rigningu, en undantekningin á þeirri stöðu eru Vestfirðir, þar sem útlit er fyrir norðaustan hvassviðri eða stormi og svalara veðri. Verður úrkoman þar því væntanlega slyddukennd.

Hiti á landinu verður á bilinu þrjú til ellefu stig þar sem hlýjast verður syðst. Á Vestfjörðum verður þó norðaustan átján til 23 metrar á sekúndu með slyddu og hita núll til þrjú stig.

Gular viðvaranir taka gildi síðar í dag á Breiðafjarðarsvæðinu og Austfjörðum. Gul viðvörun er þegar í gildi á Vestfjörðum.

Í hugleiðingum veðurfræðings segir að í kvöld og nótt bæti síðan í vind heilt yfir á landinu og á morgun verður norðaustan hvassviðri eða stormur nokkuð víða.

„Útlit er fyrir rigningu eða slyddu norðan- og austanlands, en snjókoma á þeim slóðum seinnipartinn því það kólnar smám saman með norðanáttinni. Yfirleitt þurrt veður sunnan heiða. Taka má fram að stór hluti höfuðborgarsvæðisins verður væntanlega í skjóli á morgun.

Á miðvikudag er síðan norðanátt í kortunum með björtu veðri sunnan- og vestanlands, en dálítil él norðaustantil. Það lægir fljótlega á vestanverðu landinu, en stíf norðanáttin heldur velli austanlands fram undir kvöld.

Á fimmtudag er síðan útlit fyrir rólegan vind um allt land og ekki er búist við úrkomu að neinu ráði,“ segir í hugleiðingum veðurfræðings.

Gular viðvaranir taka gildi síðar í dag á Breiðafjarðarsvæðinu og Austfjörðum. Gul viðvörun er þegar í gildi á Vestfjörðum.Veðurstofan

Veðurhorfur á landinu næstu daga

Á þriðjudag: Norðaustan 15-23 m/s. Rigning eða slydda norðan- og austanlands, en snjókoma á þeim slóðum seinnipartinn. Þurrt veður sunnan heiða. Hiti 2 til 9 stig framan af degi, mildast syðst, en kólnar síðdegis.

Á miðvikudag: Norðan 8-18, hvassast með austurströndinni. Léttskýjað sunnan- og vestanlands, en dálítil él norðaustantil. Lægir á vestanverðu landinu eftir hádegi, lægir einnig og styttir upp austanlands um kvöldið. Hiti kringum frostmark, en frost 1 til 7 stig um kvöldið.

Á fimmtudag: Breytileg átt, víða 3-8. Þurrt á landinu og bjart með köflum. Frost 0 til 5 stig yfir daginn, en frostlaust með suður- og vesturströndinni.

Á föstudag: Vaxandi suðaustanátt. Fer að rigna sunnan- og vestanlands, og hiti 2 til 7 stig. Þurrt norðaustantil á landinu og hiti kringum frostmark.

Á laugardag (fyrsti vetrardagur): Suðlæg átt og víða rigning. Hiti 3 til 8 stig.

Á sunnudag: Suðlæg átt og dálitlir skúrir, en yfirleitt þurrt á Norður- og Austurlandi. Hiti 1 til 6 stig.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×