Erlent

Fara hús úr húsi í leit að skotmörkum

Tryggvi Páll Tryggvason skrifar
Alþjóðsamfélagið virðist ekki hafa mikla trú á því að stjórn Talibana verði mildari í þetta skiptið.
Alþjóðsamfélagið virðist ekki hafa mikla trú á því að stjórn Talibana verði mildari í þetta skiptið. AP Photo/Rahmat Gul

Hermenn Talibana í Afganistan fara nú hús úr húsi í Kabúl í leit að einstaklingum sem störfuðu fyrir herlið Atlantshafsbandalagsins eða fyrrverandi ríkisstjórn landsins.

Þetta kemur fram í greiningu norsku rannsóknarstofnunarinnar RHIPTO sem safnar saman upplýsingum og gögnum fyrir Sameinuðu þjóðirnar. BBC greinir frá því að í skýrslu stofnunarinnar komi fram að hermenn Talibana fari hús úr húsi til þess að leita að skotmörkum eða til að ógna fjölskyldumeðlimum þeirra.

„Fjöldi einstaklinga er á lista Talibana og ógnin er alveg á kristaltæru,“ hefur BBC eftir Christian Nellemann sem stýrir RHIPTO. Segir hann að hver sá sem sé á svörtum lista Taliba sé í stórhættu. Þá sé möguleikinn á því að Talibanar framkvæmi fjöldaaftökur fyrir hendi.

Þýski fjölmiðilinn Deutsche Welle greindi frá því í dag að Talibanar hefði myrt fjölskyldumeðlim blaðamanns sem starfar fyrir fjölmiðilinn. Var hann myrtur þegar Talibanar fóru hús úr húsi í leit að blaðamanninum, sem nú er staddur í Þýskalandi, að því er fram kemur á vef fjölmiðilsins.

Leiðtogar Talibana hafa heitið því að virða mannréttindi og að fyrrum óvinir þeirra hafi ekkert að óttast nú þegar þeir hafa tekið völdin í landinu. Margir landsmenn eru þó fullir efasemda um þau loforð enda minnugir ógnarstjórnarinnar sem talibana stóðu fyrir þegar þeir voru síðast við völd frá 1996 til 2001.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.