Leiðtogar Talibana koma úr felum

Talibanar héldu sinn fyrsta opinbera fréttamannafund í Kabúl í gær. Fundinum stýrði Zabihullah Mujahid sem hefur verið talsmaður Talibana í tæpa tvo áratugi en kom fyrst fram opinberlega í gær. 

Þar var tekið fram að konur mættu vinna en ekki var farið nánar út í skilyrði fyrir því. En í gær voru konur hvattar til þátttöku í nýrri ríkisstjórn landsins. 

Reuters fréttastofan hefur eftir háttsettum Talibana að liðsmönnum hreyfingarinnar hafi verið fyrirskipað að sýna ekki fagnaðarlæti eftir valdatökuna. 

BBC fréttastofan segir að merki séu um að lífið sé smátt og smátt að færast í eðlilegt horf í höfuðborginni. Fleiri verslanir hafi til að mynda opnað í morgun. 

Bretar hafa heitið því að taka á móti tuttugu þúsund afgönskum flóttamönnum og í gær tóku Ástralir á móti tuttugu og sex. 

Í Fréttablaðinu í dag segir Ásmundur Einar Daðason félagsmálaráðherra að hann hafi kallað eftir tillögum frá flóttamannanefnd um hvernig taka megi á móti fólki á flótta frá Afganistan.