Innlent

Af­­bókaður víðast hvar og tekju­tapið er veru­­legt

Óttar Kolbeinsson Proppé skrifar
Ingó var fyrst afbókaður af Þjóðhátíð.
Ingó var fyrst afbókaður af Þjóðhátíð. Stöð 2

Búið er að af­bóka Ingólf Þórarins­son, eða Ingó veður­guð, af fjölda gigga síðan hópurinn Öfgar birti yfir tuttugu nafn­lausar sögur kvenna sem lýsa kyn­ferðis­legu of­beldi af hálfu Ingós. Einnig er búið að af­lýsa þriðju seríu þáttanna Í kvöld er gigg. Ingó segist hafa orðið fyrir miklu tekju­tapi síðustu vikurnar.

Ingó var afbókaður á Þjóðhátíð fyrir sléttri viku þar sem hann átti að stýra brekkusöngnum í ár. Síðan hefur að hans sögn hver afbókunin á fætur annarri fylgt í kjölfarið.

Nú síðast má nefna Kótelettuna, sem haldin var há­tíð­leg á Sel­fossi á laugar­daginn. Búið var að bóka Ingó til að spila á há­tíðinni, sem er haldin til styrktar Styrktar­fé­lagi krabba­meins­sjúkra barna, en hann var af­bókaður af henni.

Þetta stað­festir Ingó í sam­tali við Vísi. Hann kveðst hafa verið af­bókaður af mörgum giggum frá því málið kom upp og hafa orðið fyrir miklu tekju­tapi.

„Já. Þetta eru mjög mörg gigg. Ég hef haldið utan um þetta allt saman,“ segir hann. Spurður hvort hann ætli sér enn að leita réttar síns segist hann vera með lög­fræðing í málinu.

„Það á enn eftir að koma í ljós hvernig það endar. En ég fer bara rétta leið með þetta mál,“ segir Ingó.

Sjá einnig: Ingó leitar réttar síns: „Ég veit hver ég er og hvað ég hef gert“.

Í kvöld er ekki gigg

Þáttunum Í kvöld er gigg, sem voru í um­sjá Ingós og voru í sýningu á Stöð 2 í vetur, hefur nú verið af­lýst. Ingó var þar í aðalhlutverki með hljómsveit sem fékk til sín gesti úr tónlistargeiranum.

Önnur sería sem var í endur­sýningu í sumar hefur einnig verið tekin af dag­skrá.

Þetta stað­festir Þór­hallur Gunnars­son, fram­kvæmda­stjóri miðla hjá Sýn, við Vísi.

Þórhallur Gunnarsson.

„Það stóð til að það yrði gerð önnur sería í haust en við á­kváðum snemma í vor að setja þættina í pásu vegna um­ræðunnar sem var þá í gangi,“ segir Þór­hallur. 

„Það var gert í sam­ráði við alla aðila.“

Ein stigið fram undir nafni

Fyrst var greint frá máli Ingólfs eftir að hópurinn Öfgar á samfélagsmiðlinum TikTok birti fjölda sagna ýmissa kvenna sem lýstu kynferðislegu ofbeldi af hálfu Ingós. 

Sögurnar voru nafnlausar en hópurinn fullyrti að hann hefði fengið allar frásagnirnar staðfestar.

Nú nýlega steig ein konan svo fram undir nafni til að greina frá sinni sögu.

Tveimur dögum eftir að greint var frá frásögnunum kvennanna í fjölmiðlum tók þjóðhátíðarnefnd ákvörðun um að Ingó myndi ekki sjá um brekkusönginn í ár.

Vísir er í eigu Sýnar.


Tengdar fréttir

Gæslu­­­stjóri snið­­­gengur Þjóð­há­­­tíð og rit­stjóri safnar undir­skriftum

Baldur Már Róbertsson, sem hefur stýrt gæsluhópi á Þjóðhátíð síðustu átta ár, segir að hvorki hann né nokkur á hans vegum muni koma nálægt hátíðinni í ár. Tryggvi Már Sæmundsson, ritstjóri Eyjar.net og útflutningsstjóri, hefur þá stofnað til undirskriftarlista til að mótmæla því að Ingólfur Þórarinsson, eða Ingó veðurguð, hafi verið afbókaður af Þjóðhátíð.

Segir nefndina hafa vitað af á­sökunum þegar hún réð Ingó

Tryggvi Már Sæ­munds­son, rit­stjóri Eyja­r.net sem hefur safnað undir­skriftum til að mót­mæla því að Ingólfur Þórarins­son hafi verið af­bókaður af Þjóð­há­tíð, segir að þjóð­há­tíðar­nefnd hafi þegar vitað að Ingó væri um­deildur þegar hún réð hann til að sjá um brekku­sönginn.

Skilar skömminni og stendur með þol­endum of­beldis

Rakel María Hjaltadóttir, fyrrverandi kærasta Ingólfs Þórarinssonar, segist hafa verið gjörsamlega eyðilögð frá því að hún las ásakanir á hendur tónlistarmanninum sem er betur þekktur sem Ingó veðurguð. 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.