Erlent

Her Kína sagður gera út flota fiskiskipa

Samúel Karl Ólason skrifar
Þessi mynd var tekin við Whitsunrif í Suður-Kínahafi í lok síðasta mánaðar. Þá voru rúmlega tvö hundruð kínversk fiskiskip við rifið. Bláu skipin tilheyra sérstakri sveit kínverska hersins.
Þessi mynd var tekin við Whitsunrif í Suður-Kínahafi í lok síðasta mánaðar. Þá voru rúmlega tvö hundruð kínversk fiskiskip við rifið. Bláu skipin tilheyra sérstakri sveit kínverska hersins. AP/Ríkisstjórn Filippseyja

Her Kína gerir út fjölmörg blá fiskiskip sem notuð eru sem sérstök sveit til að styrkja tilkall Kínverja til hafsvæða í Asíu og þá sérstaklega Suður-Kínahafi. Tilvist þessarar sveitar hefur ekki verið viðurkennd af ráðamönnum í Peking en sérfræðingar segja hundruð skipa og þúsundir áhafnarmeðlima tilheyra henni.

Sveitin er notuð til að brjóta á fullveldi nágrannaríkja Kína, samkvæmt skýrslu sjóhers Bandaríkjanna frá því í desember, og rataði síðast í fréttirnar í síðasta mánuði. Þá birtust rúmlega tvö hundruð kínversk fiskiskip við Whitsunrif sem tilheyrir Spratlyeyjum og er innan lögsögu Filippseyja.

CNN birti í morgun ítarlega frétt um sveitina, sem er af sumum kölluð „Litlu bláu mennirnir“ en nafnið byggir á liti bátanna og „litlu grænu mönnunum“ sem gerðu innrás á Krímskaga árið 2014 en seinna kom í ljós að þar var um rússneska hermenn að ræða.

Kínverjar gera tilkall til nánast alls Suður-Kínahafs, sem Alþjóðagerðardómurinn í Haag segir ólöglegt. Ríkið hefur byggt upp eyjar á svæðinu, byggt herstöðvar og komið fyrir vopnum.

Taívan, Filippseyjar, Víetnam, Malasía og Brúnei gera einnig tilkall til hafsvæðisins en sjá má kort af kröfum Kína og annarra ríkjaí fréttinni hér að neðan.

Einn sérfræðingur sagði í samtali við CNN að áhafnarmeðlimir þessara sveita veiddu ekki fisk. Þess í stað væru sjálfvirk vopn um borð í skipunum sem henni tilheyra, skrokkur skipanna væri styrktur sérstaklega og skipin eru mun hraðskreiðari en gengur og gerist meðal fiskiskipa heimsins. Þau ná um 18 til 22 sjómílna hraða.

Skipin sem tilheyra þessari sveit eru meðal um 187 þúsund kínverskra fiskiskipa og í raun er ekki vitað hve mörg þau eru.

Áhafnir þeirra geta þó leitt stóra flota fiskiskipa í takt við markmið ríkisstjórnar Kína og hvaða hafsvæði Kínverjar gera tilkall til. Þannig geta Kínverjar í raun náð tökum á tilteknum svæðum með því að vera þar og jafnvel lengi.

Vera skipanna við umdeildar eyjur og rif veldur spennu milli ríkja og hægt væri að nota aðgerðir ríkja eins og Filippseyja gegn flotanum sem átyllu til frekari aðgerða að hálfu Kínverja.

Um svokallaðan óhefðbundin hernað er að ræða.

Níu kínversk fiskiskip eru enn við Whitsunrif. Yfirvöld í Filippseyjum kölluðu sendiherra Kína þar í landi á teppið í dag og kröfðust þess að þeim skipum sem eftir eru við rifið verði siglt á brott, samkvæmt frétt Reuters fréttaveitunnar.

Kínverskir erindrekar hafa sagt skipaflotann verið í vari við rifið vegna óveðurs á svæðinu. Utanríkisráðuneyti Filippseyja segir það ósatt.

Kínverjar halda því fram að Filippseyingar séu að gera of mikið úr málinu.

Bandaríkjamenn, bandamenn Filippseyja, hafa lýst því yfir að þeir standi við bakið á Filippseyjum í deilunni.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.