Fjórtán látnir eftir flóðbylgjuna á Indlandi

Gunnar Reynir Valþórsson skrifar 8. febrúar 2021 09:07

Talið er að allt 170 manns sé saknað eftir flóðbylgjuna. National Disaster Response Force via AP

Björgunarmenn á vegum indverska hersins leita nú að fólki sem talið er að hafi lent í flóðbylgju sem framkallaðist þegar hluti af jökli brotnaði í Himalya-fjöllunum.

Fjórtán létust svo staðfest hafi verið en allt að 170 er saknað. Hamfarirnar áttu sér stað í héraðinu Uttarakhand í gærmorgun en þegar jökullinn brotnaði fór gríðarlegt magn af ís ofan í á sem rennur niður í dal og framkallaði flóðbylgjuna sem eirði engu.

Hún tók með sér fimm brýr á leiðinni og eyðilagði tugi heimila við árbakkann. Þá lenti hún á vatnsaflsvirkjun neðar í ánni og gjöreyðilagði hana auk þess sem önnur 500 megavatta virkjun neðar í ánni sem var í byggingu eyðilagðist líka.

Margir þeirra sem saknað er eru verkamenn sem unnu við virkjunina og er talið að hluti þeirra gæti verið á lífi í göngum sem verið var að grafa á svæðinu. Í gær tókst að bjarga tólf mönnum sem festust inni í öðrum göngum í nágrenninu.

Indland Náttúruhamfarir

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.