Erlent

Lík geymd í gámum í Suður-Afríku

Samúel Karl Ólason og skrifa
Heilbrigðisstarfsmenn að störfum í Pretoria í Suður-Afríku.
Heilbrigðisstarfsmenn að störfum í Pretoria í Suður-Afríku. EPA/Phill Magakoe

Lík þeirra sem dáið hafa vegna Covid-19 í Suður-Afríku eru nú mörg geymd í gámum vegna álags á útfararstofur. Til stendur að reyna að bólusetja 67 prósent íbúa landsins á þessu ári en fyrsti skammtur bóluefna barst frá Indlandi í gær.

Nýtt afbrigði nýju kórónuveirunnar, sem veldur Covid-19, er nú orðið ráðandi í landinu. Það kallast 501Y.V2 og dreifist auðveldar manna á milli. Það greindist fyrst í Suður-Afríku í fyrra og hefur leitt til töluverðrar fjölgunar smitaðra þar.

Fjöldi innlagna og dauðsfalla hefur nærri því tvöfaldast, samanborið við fyrstu bylgjuna sem gekk yfir landið í fyrra, samkvæmt frétt AP fréttaveitunnar.

Heilt yfir hafa um ein og hálf milljón manna smitast, svo vitað sé, og um 45 þúsund dáið. Rúmlega 40 prósent allra tilfella sem greinst hafa í Afríku hafa greinst í Suður-Afríku.

Líkhús eru nú orðin full og hefur stærsta útfararstofufyrirtæki landsins sent kæligáma til útibúa sinna víða um landið.

Þrátt fyrir það hefur verið að slaka á sóttvarnaraðgerðum.

Sjá einnig: Slaka á að­gerðum og fá sína fyrstu bólu­efna­skammta

Eins og áður segir bárust fyrstu skammtar bóluefnis til Suður-Afríku á dögunum. Þar var um milljón skammta að ræða frá Indlandi og stendur til að hálf milljón berist seinna í mánuðinum. Í fyrstu lotu stendur til að bólusetja heilbrigðisstarfsmenn á framlínunni gegn Covid-19.

Mörg ríki Afríku kaupa bóluefni í gegnum Afríkubandalagið sem hefur tryggt sér 600 milljónir skammta. AP segir mörg ríki þó einnig bundið vonir við það að fá bóluefni frá Kína.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.