Erlent

Slaka á að­gerðum og fá sína fyrstu bólu­efna­skammta

Vésteinn Örn Pétursson skrifar
Suðurafrísk stjórnvökd stefna á að hafa bólusett 40 milljónir íbúa í landinu fyrir árslok 2021. Myndin er tekin fyrir utan Covid-skimunarstöð í Höfðaborg.
Suðurafrísk stjórnvökd stefna á að hafa bólusett 40 milljónir íbúa í landinu fyrir árslok 2021. Myndin er tekin fyrir utan Covid-skimunarstöð í Höfðaborg. Brenton Geach/Gallo Images via Getty

Stjórnvöld í Suður-Afríku hafa slakað á takmörkunum vegna útbreiðslu kórónuveirunnar í landinu. Bráðsmitandi afbrigði veirunnar hefur herjað á landið sem hefur nú fengið sína fyrstu skammta af bóluefni.

Cyril Ramaphosa, forseti Suður-Afríku, tilkynnti um tilslakanir á aðgerðunum í dag. Í þeim felst meðal annars að strandir verða opnar almenningi að nýju og trúarlegar athafnir verða leyfðar, bæði þó með ákveðnum takmörkunum í gildi. Þá verður banni á sölu áfengis í landinu aflétt, en bannið var afar óvinsælt meðal almennings.

Suður-Afríka er það Afríkuland sem hvað verst hefur komið út úr kórónuveirufaraldrinum, en samkvæmt tölfræði Johns Hopkins-háskóla í Bandaríkjunum hafa 1,4 milljónir manna greinst með veiruna í landinu og yfir 44 þúsund látið lífið af völdum Covid-19.

Fjölmörg ríki heims hafa takmarkað eða bannað alfarið ferðalög frá Suður-Afríku vegna útbreiðslu skæðs afbrigðis kórónuveirunnar, sem kennt er við landið. Afbrigðið er talið eiga uppruna sinn í landinu og vera meira smitandi. Niðurstöður rannsókna virðast þá benda til þess að afbrigðið þoli bóluefni að einhverju leyti betur en önnur afbrigði.

Suður-Afríka tók í dag á móti sínum fyrstu skömmtum bóluefnis við kórónuveirunni. Um er að ræða eina milljón skammta bóluefnisins frá sænsk-breska fyrirtækinu AstraZeneca. Stjórnvöld í landinu segjast hafa tryggt sér 50 milljónir skammta af bóluefni og vilja bólusetja minnst 40 milljónir manna fyrir lok þessa árs.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.