Enski boltinn

Meira kemur til með að mæða á Gylfa í bikarslagnum

Sindri Sverrisson skrifar
Gylfi Þór Sigurðsson og félagar mæta Rotherham í dag.
Gylfi Þór Sigurðsson og félagar mæta Rotherham í dag. Getty/Tony McArdle

Gylfi Þór Sigurðsson hefur verið í stóru hlutverki hjá Everton síðustu vikur og útlit er fyrir enn meira mæði á honum í dag þegar liðið freistar þess að komast áfram í ensku bikarkeppninni í fótbolta.

Everton tekur á móti Rotherham kl. 12 í dag í fyrsta leiknum af átta sem sýndir verða á íþróttarásum Stöðvar 2 í dag og á morgun. Kári Árnason, félagi Gylfa úr landsliðinu, gerði garðinn frægan hjá Rotherham á árunum 2012-2015 og fór með liðinu upp um tvær deildir, í þá næstefstu, þar sem það situr nú í næstneðsta sæti.

Franski bakvörðurinn Lucas Digne hefur jafnað sig af ökklameiðslum, fyrr en áætlað var, og gæti spilað í dag eftir að hafa verið úr leik síðan í nóvember.

Bikarleikir helgarinnar á íþróttarásum Stöðvar 2:

9. janúar:

  • 12.00 Everton - Rotherham (Stöð 2 Sport 2)
  • 15.00 QPR - Fulham (Stöð 2 Sport 2)
  • 17.30 Arsenal - Newcastle (Stöð 2 Sport 2)
  • 20.00 Man. Utd - Watford (Stöð 2 Sport 2)

10. janúar:

  • 13.30 Man. City - Birmingham (Stöð 2 Sport 2)
  • 13.30 Chelsea - Morecambe (Stöð 2 Sport 3)
  • 17.00 Marine - Tottenham (Stöð 2 Sport 3)
  • 19.30 Newport - Brighton (Stöð 2 Sport 3)

Carlo Ancelotti, stjóri Everton, ákvað að gefa sóknarmönnunum Dominic Calvert-Lewin og Richarlison kærkomna hvíld í dag. Þess vegna gæti Ítalinn þurft að treysta meira en ella á Gylfa í sóknarleik liðsins. 

Kólumbíumaðurinn James Rodriguez gæti þó leikið sinn fyrsta leik í byrjunarliðinu frá því 5. desember, eftir að hafa jafnað sig af kálfameiðslum og komið inn á í síðasta leik, 1-0 tapinu gegn West Ham á nýársdag, og Alex Iwobi er einnig heill heilsu eftir að hafa misst af þeim leik.

Jonjoe Kenny og markmaðurinn Jordan Pickford munu ekki spila í dag. „Sumir eru meiddir og sumir fá hvíld,“ sagði Ancelotti um fjarveru leikmanna. Hann staðfesti að Tyrkinn Cenk Tosun myndi leiða framlínu Everton og að Ben Godfrey yrði í miðri vörninni.


Enska bikarkeppnin, FA Cup, er á Stöð 2 Sport en upplýsingar um útsendingar má finna hér. FA Cup er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.