WHO hvetur ríki heims til að rannsaka gömul sýni

Talsmaður Alþjóðaheilbrigðismálastofnunarinnar hvetur ríki heims til að fara að fordæmi Frakka sem rannsökuðu á dögunum gömul sýni úr lungabólgusjúklingum en í ljós kom að kórónuveiran hafði borist til Frakklands tæpum mánuði áður en stjórnvöld tilkynntu um fyrsta kórónuveirutilfellið í landinu í lok janúar.

Al Jazeera hefur eftir Christian Lindmeier, talsmanni stofnunarinnar, að það hefði ekki komið Alþjóðaheilbrigðismálastofnuninni á óvart að eitt af tuttugu og fjögur sem tekin voru úr lungnabólgusjúklingum í Frakklandi í desember hefði reynst jákvætt fyrir Covid-19.

Lindmeier fjallaði um uppgötvunina á blaðamannafundi í Genf í gær.

Mögulegt væri að hið sama gilti um aðrar þjóðir og að faraldurinn hefði borist mun fyrr til landanna en áður var talið. Því væri afar mikilvægt að ríki heims athugi gömul sýni, einkum frá desembermánuði, á ný í þeim tilgangi að kanna hvort sjúklingar hafi verið með Covid-19. Ef ríki heims legðu hönd á plóg myndi vísindasamfélagið öðlast mun skýrari mynd af þróun faraldursins frá upphafi.

Læknateymi á Avicenne-Jean Verdier spítalanum í Frakklandi rannsökuðu gömul sýni sem voru tekin úr lungabólgusjúklingum í desember og athuguðu hvort einhver sjúklinganna hefði verið með kórónuveiruna. Af 24 sýnum kom í ljós að eitt þeirra var jákvætt.