Eldhafið í Kaliforníu ógnar þúsundum heimila

Gróðureldar í norðurhluta Kaliforníu í Bandaríkjunum ógna þúsundum heimila. Erfitt er fyrir slökkviliðsmenn að nálgast þá vegna landslagsins, sem er bratt og þakið giljum. Auk fjölmargra stærri elda kvikna ítrekað einnig smærri eldar.

Í gærkvöldi var áætlað að 367 gróðureldar loguðu í Kaliforníu. Á þessu ári hafa slökkviliðsmenn þurft að eiga við 6.754 gróðurelda. Á sama tíma í fyrra voru eldarnir 4.007. Rúmlega 300 þúsund ekrur hafa brunnið á árinu.

Eldarnir hafa margir hverjir kviknað vegna eldinga og sterkir vindar auka dreifingu þeirra. Gífurleg hitabylgja er á svæðinu og hefur hitinn komið verulega niður á slökkviliðsmönnum.

Gavin Newsom, ríkisstjóri Kaliforníu, lýsti í gær yfir neyðarástandi vegna eldanna. Hann sagði þá að á undanförnum þremur sólarhringum hafi eldingar slegið niður til jarðar um ellefu þúsund sinnum.

Samkvæmt frétt AP fréttaveitunnar dó einn í gærmorgun þegar þyrla sem hann notaði til að hella vatni á eldanna brotlenti. Aðrir hafa slasast og þar af einn sem hlaut alvarleg brunasár.

Miklum fjölda fólks hefur verið gert að yfirgefa heimili sín vegna eldanna og hafa mörg hús brunnið.

Skammt norður af San Francisco eru eldar sem spanna 124 ekrur. Þeir hafa brennt rúmlega hundrað byggingar og ógna 25 þúsundum til viðbótar. LA Times segir það eldhaf það stærsta á svæðinu og það hafi dreift verulega hratt úr sér.

Þar segir einnig að slökkviliðsmenn Kaliforníu séu að þrotum komnir vegna fjölda elda og stærða þeirra.