Bróðir leikmanns Tottenham skotinn til bana

Frönsku miðlarnir Le Point, La Dépêche og Europe 1 segja frá því að Tottenham maðurinn Serge Aurier hafi misst bróður sinn í nótt.

Christopher Aurier, bróðir Serge Aurier var þá skotinn til bana fyrir utan næturklúbb í borginni Toulouse í Frakklandi.

Atvikið varð klukkan fimm um morguninn að staðartíma en morðinginn komst í burtu á flótta og lögreglan hefur ekki náð honum.

Nágrannar næturklúbbsins hringdu á lögregluna eftir að þeir fundu mann liggjandi á jörðinni með skotsár í maganum.

Christopher Aurier var fluttur á sjúkrahús en þar tókst læknum ekki að bjarga lífi hans.

Christopher Aurier var 26 ára gamall og yngri bróðir Serge Aurier sem er aðeins einu ári eldri.

Fótboltaferill Christopher Aurier var ekki eins glæsilegur og eldri bróður hans því hann var að spila með liði Toulouse Rodéo í frönsku fimmtu deildinni. Þeir byrjuðu báðir hjá Lens en aðeins ferill Serge Aurier komst á flug.