Stjórnmálaleiðtogar og forsvarsmenn stofnana mættust á stafrænum fundi Alþjóðavinnumálastofnunarinnar í dag til þess að ræða um áhrif faraldursins á hagkerfi heimsins og vinnumarkaðinn.
Antonio Guterres, framkvæmdastjóri Sameinuðu þjóðanna, sagði að faraldurinn hafi bitnað á öllum heimshlutum, öllum fyrirtækjum og hverjum einasta verkamanni.
„Þessi krísa hefur afhjúpað veikleika kerfisins, sem Alþjóðavinnumálastofnunin hefur ítrekað bent á. Þetta er vaxandi misskipting, mismunun á grundvelli kyns, skortur á tækifærum fyrir ungmenni, stöðnun launa, loftslagsbryetingar og svo margt fleira,“ sagði framkvæmdastjórinn.
Kristalina Georgieva, formaður Alþjóðagjaldeyrissjóðsins, tók í sama streng. Sjóðurinn spáir um fimm prósenta samdrætti á heimsvísu í ár og að níutíu og fimm prósent allra ríkja verði verr stödd í árslok en ársbyrjun. Þó má finna tækifæri í þessari erfiðu stöðu.
„Nú þarf að líta til þess að mynda stefnu um græna enduruppbyggingu sem ætti að skapa milljónir starfa og á sama tíma vinna gegn loftslagsbreytingum.“
