Munu Manchester-liðin berjast um sömu leikmennina í sumar?

Talið er að Manchester United og nágrannar þeirra í Manchester City muni berjast um sömu bitana er leikmannamarkaðurinn opnar í sumar.

Miguel Delaney hjá The Independent hefur það eftir öruggum heimildum að bæði Manchester-liðin séu að leita sér að miðverði. Reyndar þarf engan doktor til að segja þeim sem fylgjast með enska boltanum að Ole Gunnar Solskjær og Pep Guardiola væru til í að fjárfesta í varnarmanni í sumar.

Samkvæmt Delaney eru tveir leikmenn á óskalista beggja liða, sömu tveir leikmennirnir. Kalidou Koulibaly, varnarmaður Napoli, og Milan Skriniar, varnarmaður Inter Milan.

Þörf City á miðverði er brýnni en United. Liðið hefur ekki enn fyllt skarð Vincent Kompany og það virðist sem dagar bæði Nicolas Otamendi og John Stones séu taldir. Svo virðist sem Pep hafi komist að þeirri niðurstöðu að Koulibaly sé maðurinn sem gæti leyst varnarvandræði liðsins. 

Koulibaly verður orðinn þrítugur þegar næsta tímabil fer af stað og leikmaðurinn því að renna út á tíma hvað varðar félagaskipti til stórliðs í Evrópu. Fæst stórlið vilja fjárfesta í leikmönnum yfir þrítugt og mögulega vill Senegalinn nýja áskorun eftir að hafa verið í herbúðum Napoli frá 2014.

Skriniar - sem er aðeins 25 ára gamall - gæti þó reynst ódýrari kostur fyrir City-liðið. Ástæðan er einfaldlega sú að ef Inter missir Lautaro Martinez - argentíska framherja liðsins - þá vill Antonio Conte, þjálfari liðsins, fylla upp í skarðið með öðrum Argentínumanni, Sergio Aguero.

Mögulegt Evrópubann City mun svo að öllum líkindum hafa áhrif á hvaða leikmenn liðið fær til sín eða selur í sumar. City áfrýjaði upprunalega dómnum sem átti að banna liðinu að taka þátt í leikjum á vegum knattspyrnusambands Evrópu, UEFA, til tveggja ára. Ekki er víst hvenær lokaniðurstaða fæst í málinu.

Ole Gunnar Solskjær, þjálfari Man Utd, er enn að velta fyrir sér hvernig best sé að nýta það fjármagn sem honum stendur til boða. Það virðist sem félagið eigi í góðu sambandi við Inter en alls hafa þrír leikmenn United fært sig frá Manchester-borg til Mílanó á síðustu tólf mánuðum.

Inter keypti þá Romelu Lukaku og Ashley Young ásamt því að fá Alexis Sanchez á láni. Sá síðastnefndi gæti verið notaður sem skiptimynt í kaupunum á Skriniar.

Einnig spila mögulegar sölur á mönnum á borð við Phil Jones og Chris Smalling inn í hvort enska félagið geti borgað uppsett verð. Talið er nær öruggt að Smalling gangi til liðs við Roma þegar lánssamningur hans við félagið rennur út. 

Þá vonast forráðamenn United að Steve Bruce bjargi þeim enn á ný með því að fjárfesta í leikmönnum sem enginn vill. Þannig gæti farið svo að Jones verði leikmaður Newcastle United í sumar.

Fari svo að United hafi ekki efni á leikmönnunum eða þeir velji báðir að semja við City er talið að liðið muni reyna fá Joe Rodon hjá Swansea City eða Dayot Upamecano hjá RB Leipzig.