Íslenski boltinn

2 dagar í Pepsi Max: Eignaðist framtíðarlandsliðsmann og varð Íslandsmeistari á sama sólarhring

Óskar Ófeigur Jónsson skrifar
Tryggvi Hrafn Haraldsson fæddist á sama sólarhring og faðir hans, Haraldur Ingólfsson, varð Íslandsmeistari fimmta árið í röð með Skagamönnum.
Tryggvi Hrafn Haraldsson fæddist á sama sólarhring og faðir hans, Haraldur Ingólfsson, varð Íslandsmeistari fimmta árið í röð með Skagamönnum. Vísir/Daníel Þór

Pepsi Max deild karla fer aftur af stað 13. júní næstkomandi. Það er mikil spenna fyrir því að boltinn fari aftur að rúlla en lengsta undirbúningstímabil í fótboltaheiminum varð enn lengra þökk sé kórónuveirunni.

Vísir ætlar að telja niður í fyrsta leik með því að rifja upp eitt og annað frá sögu úrvalsdeildar karla í knattspyrnu. Í dag eru 2 dagar í fyrsta leikinn sem verður á milli Vals og KR á Hlíðarenda 13. júní næstkomandi.

Tryggvi Hrafn Haraldsson er fæddur 30. september 1996 en daginn áður tryggðu Skagamenn sér fimmta Íslandsmeistaratitilinn í röð með 4-1 sigri á KR í hreinum úrslitaleik um titilinn og fór sá leikur upp á Akranesi.

Haraldur Ingólfsson fagnar Íslandsmeistaratitlinum á forsíðu DV Sport en stóra myndin ef af Ólafi Þórðarsyni fyrirliða liðsins með bikarinn.Skjámynd af timarit.is

Faðir hans, Haraldur Ingólfsson, var lykilmaður í Skagaliðinu og í þessum leik á móti KR þá lagði hann upp fyrsta markið fyrir Ólaf Adolfsson og skoraði síðan annað markið sjálfur. Haraldur var með 9 mörk og 11 stoðsendingar í 18 leikjum á þessu tímabili.

„Ég er í skýjunum. Síðasti sólarhringur hefur veitt mér mikla hamingju, það hálfa væri nóg," sagði Haraldur Ingólfsson í viðtali við Morgunblaðið, eftir að hafa verið viðstaddur fæðingu sonar síns í gær. Þar kom fram að strákurinn var tæpar sextán merkur og 54 sm en hann var annað barn Haraldar og Jónínu Víglundsdóttur, eiginkonu hans.

Þá vissu menn ekki að þarna var á ferðinni framtíðarlandsliðsmaður og lykilmaður í Skagaliðinu alveg eins og bæði faðir sinn og móðir sín.

Haraldur náði því að verða Íslandsmeistari fimm sinnum á ferlinum (1992-1996) og Jónína Víglundsdóttir varð Íslandsmeistari þrisvar sinnum (1984, 1985 og 1987). Alla titlana unnu þau með ÍA.

Tryggvi Hrafn Haraldsson spilaði sína fyrstu leiki með ÍA í efstu deild sumarið 2015 en er nú kominn með 13 mörk og 10 stoðsendingar í 55 leikjum í efstu deild fyrir Skagamenn.

Hann á enn heilmikið í land að ná foreldrum sínum. Haraldur Ingólfsson skoraði 59 mörk í 189 leikjum í efstu deild fyrir ÍA og móðir hans, Jónína Víglundsdóttir, var með 40 mörk í 134 leikjum fyrir ÍA í efstu deild.




Fleiri fréttir

Sjá meira


×