Myndirnar af bin Laden eru skelfilegar

Sérvaldir bandarískir stjórnmálamenn hafa fengið að skoða myndirnar af Osama bin Laden eftir að hann var skotinn til bana í Pakistan á dögunum. Um er að ræða tólf myndir. Níu eru teknar í felustað bin Ladens í Pakistan og þrjár á flugmóðurskipinu Vinson þegar honum var sökkt í sæ.

 

Einn stjórnmálamannanna er republikaninn James Inhofe. Hann segir að myndirnar séu skelfilegar. Bin Laden var skotinn í höfuðið og þess sjást greinilega merki. Obama forseti ákvað að myndirnar væru of hrottalegar til þess að þær yrðu birtar almenningi.