Liverpool hættir við vináttuleik vegna ungstirnis

Liverpool hefur hætt við vináttuleik við þýska liðið Borussia Mönchengladbach sem átti að fara fram í ágúst vegna áhuga þýska félagsins á ungstirninu Rhian Brewster.

Það er Sky Sports sem greinir frá þessu í kvöld. Þá eiga forráðamenn Liverpool að hafa skrifað til Mönchengladbach og varað Þjóðverjana við því að eltast við Brester.

Brewster steig fram á sjónarsviðið þegar hann varð markahrókur heimsmeistaramóts undir 17 ára liða sem England vann á Indlandi í október 2017. Þá var hann einnig í sviðsljósinu fyrr á þessu ári þegar Spartak Moskva var ákært fyrir kynþáttanýð gegn honum en UEFA vísaði málinu frá vegna skorts á sönnunargögnum.

Brewster er að ná sér af meiðslum þessa stundina en hann er mjög mikils metinn innan herbúða Liverpool og er greinilega lítill vilji fyrir því að hann yfirgefi félagið.