Erlent

Stuðnings­menn ISIS flýja fanga­búðir í Sýr­landi

Hallgerður Kolbrún E. Jónsdóttir skrifar
Fólk fagnar því að hersveitir sem studdar eru af Tyrkjum hafi náð stjórn í sýrlenska bænum Tal Abyad
Fólk fagnar því að hersveitir sem studdar eru af Tyrkjum hafi náð stjórn í sýrlenska bænum Tal Abyad AP/Ismail Coskun

Hundruð stuðningsmanna hryðjuverkasamtakanna sem kenna sig við íslamskt ríki, ISIS, flúðu úr fangabúðum í norðurhluta Sýrlands á sunnudag á meðan á átökum stóð á milli innrásarhersveita, sem studdar eru af tyrkneskum yfirvöldum, og Kúrda. Fréttastofa AP greinir frá þessu.

Vika er liðin síðan Donald Trump, Bandaríkjaforseti, fyrirskipaði Bandarískum hersveitum að yfirgefa norðanvert Sýrland. Þessi ákvörðun berskjaldaði Kúrda en Tyrkir líta á þá sem hryðjuverkahóp vegna tengsla þeirra við kúrdíska uppreisnarmenn í Tyrklandi.

Átökin milli Tyrklands og fyrrum-bandamanna Bandaríkjanna, Sýrlenska lýðræðishersins, SDF, verða „blóðugri með hverri klukkustund sem líður,“ sagði varnarmálaráðherra Bandaríkjanna, Mark Esper, á sunnudag.

Reykur stígur upp frá bænum Ras al-Ayn í Sýrlandi eftir árás hersveita sem studdar eru af Tyrkjum. AP/Emrah Gurel

Bandarískar hersveitir eru enn að undirbúa brottflutning sinn en ástandið í norður Sýrlandi hefur farið versnandi en fregnir bárust um það fyrr í dag að tyrkneskar hersveitir hafi tekið nokkra almenna borgara af lífi, þar á meðal kúrdíska stjórnmálakonu.

Konurnar og börnin sem var haldið í Ayn Issa búðunum risu upp gegn vörðunum snemma á sunnudag eftir að tyrknesk sprengja sprakk nærri þeim. Þau flúðu öll en ekki er vitað hvert þau munu halda, en flest eru stuðningsmenn hryðjuverkasamtakanna sem kenna sig við íslamskt ríki.

Recep Tayyip Erdogan, Tyrklandsforseti, þvertekur fyrir friðarviðræður við Kúrda. AP

Þá hefur Racep Tayyip Erdogan, Tyrklandsforseti, þvertekið fyrir það að semja við Kúrda í Sýrlandi og sagði hann Tyrki ekki semja við „hryðjuverkamenn.“ Ákvörðun Trump um að víkja frá landamærunum hefur verið verulega gagnrýnd og sagði meðal annars Lenya Rún Anwar Faraj, íslenskur Kúrdi, í grein sem hún birti í síðustu viku að ákvörðunin gefi Tyrklandi „grænt ljós til að ráðast á Kúrda.“

Kúrdar hafa lengi verið í fylkingarbrjósti ásamt bandarískum hersveitum í baráttunni gegn hryðjuverkasamtökunum sem kenna sig við íslamskt ríki.

Eftir að átökin á milli Kúrda og Tyrkja brutust út hafa áhyggjur vaknað um að stuðningsmenn ISIS sem haldið hefur verið föngum í norðurhluta Sýrlands myndu ná að flýja og auðvelda hryðjuverkasamtökunum að koma saman á ný á svæðinu. 

Hersveitir, sem studdar eru af Tyrkjum, fagna því að þeir hafi náð stjórn í sýrlenska landamærabænum Tal Abayad. AP/Cavit Ozgul

Eftir atburðina í Ayn Issa sagði Jelal Ayaf, háttsettur starfsmaður við búðirnar, í samtali við fjölmiðla á svæðinu að 859 manns hafi flúið úr þeim hluta búðanna þar sem eiginkonur, ekkjur og börn stríðsmanna ISIS voru til húsa. Þá sagði hann að nokkrir hafi verið teknir í hald á ný en að aðrir stuðningsmenn samtakanna í búðunum hafi líka náð að sleppa.

Samkvæmt upplýsingum frá Sameinuðu þjóðunum hafa meira en 130.000 Sýrlendingar þurft að yfirgefa heimili sín síðan aðgerðir Tyrkja hófust fyrir aðeins fimm dögum síðan, þar á meðal Sýrlendingar sem voru á flótta innan eigin lands vegna borgarastyrjaldarinnar sem hefur geisað í landinu síðastliðin átta ár.

Tyrknesk yfirvöld segja að 440 kúrdískir hermenn hafi látið lífið síðan aðgerðirnar hófust á miðvikudag en Sýrlenski lýðræðisherinn segir aðeins 56 hermanna sinna hafa látið lífið. Þá segja tyrknesk yfirvöld að fjórir tyrkneskir hermenn hafi látið lífið og sextán sýrlenskir bandamenn þeirra til viðbótar.


Tengdar fréttir

Tyrkir ná landamæraborg á sitt vald

Tyrkneski herinn hefur náð sýrlensku landamæraborginni Ras al-Ayn á sitt vald, um er að ræða stærstu og mikilvægustu landvinninga Tyrkja síðan að innrás í Sýrland hófst 9. október síðastliðinn

Tyrkir verði beittir við­skipta­þvingunum

Repúblikanar á Bandaríkjaþingi áforma nú smíði lagafrumvarps sem felur í sér að Tyrkir verði beittir viðskiptaþvingunum vegna innrásárinnar í Kúrdahéruð Sýrlands.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.