Pochettino ætlar ekki að versla neitt í janúar

Mauricio Pochettino, knattspyrnustjóri Tottenham, á ekki von á því að neinar hreyfingar verði á leikmannamálum Tottenham í janúar.

Pochettino sagði í september að hann ætlaði að nota janúarmánuð til þess að taka til í leikmannahópnum en nú virðist hann hafa skipt um skoðun og segist trúa á þann hóp sem hann er með.

„Ég trúi á þá leikmenn sem við höfum í Tottenham í dag. Ég held ekki að það verði hreyfingar í janúar,“ sagði Pochettino.

„Ég ber virðingu fyrir skoðunum allra og ég veit að fólk mun segja að við þurfum að gera breytingar. En þetta er mín ákvörðun og ég ætla að halda mig við mína leikmenn.“

Tottenham er aðeins búið að ná í þrjá sigra í öllum keppnum á þessu tímabili og liðið hefur tapað fjórum af síðustu fimm leikjum.

Tottenham mætir Watford í ensku úrvalsdeildinni á laugardag.