Siewert rekinn frá Huddersfield eftir aðeins einn sigur í 19 leikjum

Huddersfield Town hefur sagt knattspyrnustjóranum Jan Siewert upp störfum.

#htafc has this evening terminated the contract of Head Coach Jan Siewert with immediate effect.https://t.co/GMNFJU1TL0

— Huddersfield Town (@htafc) August 16, 2019

Huddersfield tapaði 1-2 fyrir Fulham á heimavelli í 3. umferð ensku B-deildarinnar í kvöld. Það reyndist banabiti Siewerts.

Þjóðverjinn tók við Huddersfield í janúar en tókst ekki að bjarga liðinu frá falli úr ensku úrvalsdeildinni.

Huddersfield hefur aðeins fengið eitt stig af níu mögulegum í B-deildinni á tímabilinu og féll úr leik í deildabikarnum fyrir C-deildarliði Lincoln City.

Siewert stýrði Huddersfield í 19 leikjum. Aðeins einn þeirra vannst, þrír enduðu með jafntefli og 15 töpuðust.

Eini sigur Huddersfield undir stjórn Siewerts kom gegn Wolves 26. febrúar. Síðan þá eru liðnar tæpir sex mánuðir.