Dómararnir gáfu Bóasi ný spjöld

Bóas, hinn eldheiti stuðningsmaður KR, fékk góða gjöf í kvöld.

Fyrir viðureign KR og Víkings R. á Meistaravöllum afhentu dómarar leiksins Bóasi ný spjöld, bæði gult og rautt.

Bóas er jafnan vopnaður spjöldum á leikjum KR og er ófeiminn að lyfta þeim ef honum finnst brotið á sínum mönnum.

KR birti skemmtilega mynd af Bóasi með nýju spjöldin á Twitter. Hana má sjá hér fyrir neðan.

Hann Bóas okkar er orðinn landsþekktur ekki síst fyrir vinsamleg tilmæli sín til dómara úr stúkunni. Dómaratríó kvöldsins vildi sýna þakklæti sitt í verki og færði honum nýtt sett af spjöldum að gjöf fyrir leik. Höfðinglegt af Einari, Bryngeiri og Andra #allirsemeinnpic.twitter.com/hPt5bk0foQ

— KR Reykjavik FC (@KRreykjavik) August 19, 2019

Bóas fékk ekki bara ný spjöld í kvöld heldur sá hann sína menn vinna 1-0 sigur. Kristján Flóki Finnbogason skoraði eina mark leiksins.

KR er með níu stiga forskot á toppi Pepsi Max-deildarinnar þegar fimm umferðir eru eftir.