Gylfi ekki á lista Daily Mail yfir bestu leikmennina utan efstu sex liðanna

Þrátt fyrir að hafa skorað 13 mörk og lagt sex upp á síðasta tímabili er Gylfi Þór Sigurðsson ekki á lista Daily Mail yfir bestu leikmennina utan efstu sex liðanna í ensku úrvalsdeildinni (Manchester City og United, Tottenham, Liverpool, Arsenal og Chelsea).

Á listanum eru tíu leikmenn. Einnig eru nefndir tíu leikmenn sem komu til greina. Gylfi er heldur ekki þar á meðal.

Einn leikmaður Everton er á lista Daily Mail; Brasilíumaðurinn Richarlison. Hann skoraði 13 mörk á síðasta tímabili, líkt og Gylfi. Í sumar varð hann svo Suður-Ameríkumeistari með brasilíska landsliðinu. Frakkinn Lucas Digne er einn þeirra sem komu til greina á listann.

Wilfried Zaha, leikmaður Crystal Palace, er líka á listanum. Everton vill fá Fílbeinsstrendinginn og hefur gert tilboð í hann.

Leicester City á tvo leikmenn á listanum; belgíska miðjumanninn Youri Tielemans og enska vinstri bakvörðinn Ben Chilwell. Markahrókurinn Jamie Vardy er ekki á listanum.

Liðsfélagi Birkis Bjarnasonar hjá Aston Villa, Jack Grealish, er á listanum. Samherji Jóhanns Berg Guðmundssonar hjá Burnley, James Tarkowski, er meðal þeirra sem komu til greina.

Listann í heild sinni má sjá með því að smella hér.